ലോകകപ്പിൽ ഓസ്ട്രേലിയയോട് പകരം വീട്ടേണ്ടത് ഇന്ത്യൻ ടീമിന് ആവശ്യമായിരുന്നെന്ന് ഇന്ത്യൻ ക്യാപ്റ്റൻ വിരാട് കോഹ്‌ലി. ലോകകപ്പിൽ ഇന്ത്യയുടെ രണ്ടാമത്തെ മത്സരത്തിൽ 36 റൺസിനാണ് കഴിഞ്ഞ തവണത്തെ ജേതാക്കളായ ഓസ്ട്രേലിയയെ ഇന്ത്യ തോൽപ്പിച്ചത്. ആദ്യം ബാറ്റ് ചെയ്ത ഇന്ത്യ 5 വിക്കറ്റ് നഷ്ടത്തിൽ 352 റൺസ് എടുത്തിരുന്നു. തുടർന്ന് ബാറ്റ് ചെയ്ത ഓസ്ട്രലിയ 316 റൺസിന്‌ എല്ലാവരും പുറത്താവുകയായിരുന്നു.
ഇന്ത്യയിൽ നടന്ന പരമ്പരയിൽ തോറ്റതുകൊണ്ട് തന്നെ ഇന്ത്യക്ക് ഓസ്ട്രേലിയക്കെതിരായ ജയം അനിവാര്യമായിരുന്നെന്ന് കോഹ്‌ലി പറഞ്ഞു. ആദ്യ പന്ത് മുതൽ താരങ്ങൾ ജയിക്കേണ്ട ആവശ്യകത കാണിച്ചു തരുകയും ചെയ്തു. ഓപ്പണർമാരുടെ മികച്ച പ്രകടനവും ബാറ്റിങ്ങ് പിച്ചിൽ മികച്ച പ്രകടനം കാഴ്ചവെച്ച ബൗളർമാരുടെ പ്രകടനവും ഇന്ത്യക്ക് ജയം നേടികൊടുത്തെന്ന് കോഹ്‌ലി പറഞ്ഞു. ഹർദിക് പാണ്ട്യയുടെ പ്രകടനവും ധോണിയുടെ പ്രകടനവും ഇന്ത്യക്ക് തുണയായെന്നും ഇന്ത്യൻ ക്യാപ്റ്റൻ കൂട്ടിച്ചേർത്തു.
ജൂൺ 13ന് ട്രെന്റ് ബ്രിഡ്ജിൽ വെച്ച് ന്യൂസിലാൻഡിനെതിരെയാണ് ലോകകപ്പിൽ ഇന്ത്യയുടെ മൂന്നാമത്തെ മത്സരം.
