ത്രിരാഷ്ട്ര ഏകദിന പരമ്പരയില്‍ തുടരെ രണ്ട് ശതകങ്ങള്‍ നേടിയ ഷായി ഹോപ് ലോകോത്തര കളിക്കാരനായി മാറുമെന്ന് അഭിപ്രായപ്പെട്ട് വിന്‍ഡീസ് നായകന്‍ ജേസണ്‍ ഹോള്‍ഡര്‍. അയര്‍ലണ്ടിനെതിരെ 170 റണ്‍സ് നേടിയ ഷായി ഹോപ് അടുത്ത മത്സരത്തില്‍ 109 റണ്‍സാണ് ബംഗ്ലാദേശിനെതിരെ നേടിയത്. 47 ഇന്നിംഗ്സുകളില്‍ നിന്ന് 2000 ഏകദിന റണ്‍സ് മറികടക്കുവാന്‍ സാധിച്ച ഷായി ഹോപ് സര്‍ വിവിയന്‍ റിച്ചാര്‍ഡ്സിന്റെ നേട്ടം ഇതിലൂടെ മറകിടക്കുകാിരുന്നു.
സമാനമായ രീതിയില്‍ പ്രകടനങ്ങള്‍ പുറത്തെടുക്കുകയാണെങ്കില്‍ വിന്‍ഡീസ് സൃഷ്ടിച്ച ഏറ്റവും മികച്ച ക്രിക്കറ്റ് താരമായി താമസിക്കാതെ ഷായി ഹോപ് മാറുമെന്ന് ജേസണ്‍ ഹോള്‍ഡര്‍ പറഞ്ഞു. കഴിഞ്ഞ രണ്ട് വര്‍ഷമായി ഷായി ഹോപ്പാണ് ഞങ്ങളുടെ ഏറ്റവും സ്ഥിരതയാര്‍ന്ന പ്രകടനം പുറത്തെടുക്കുന്നയാളെന്ന് പറഞ്ഞ ഹോള്‍ഡര്‍ താരം വിന്‍ഡീസ് താരങ്ങളില്‍ വേഗത്തില്‍ 2000 റണ്‍സ് തികയ്ക്കുന്നയാളായതിനെയും പ്രകീര്‍ത്തിച്ചു.
