ഇംഗ്ലണ്ടില്‍ വളരെ നേരത്തെ എത്തുന്നത് മതിയായ തയ്യാറെടുപ്പുകള്‍ക്ക് ഗുണം ചെയ്യും – ഷഹീന്‍ അഫ്രീദി

ഇംഗ്ലണ്ട് ദൗത്യം എന്നും ശ്രമകരമാണെങ്കിലും വളരെ നേരത്തെ അവിടെ എത്തുന്നത് വേണ്ട വിധത്തിലുള്ള തയ്യാറെടുപ്പുകള്‍ക്ക് ഗുണകരമാകുമെന്ന് അഭിപ്രായപ്പെട്ട് ഷഹീന്‍ അഫ്രീദി. ആദ്യമായാണ് ഇംഗ്ലണ്ടില്‍ ടെസ്റ്റ് മത്സരങ്ങള്‍ കളിക്കുന്നതെങ്കിലും താന്‍ ഏറെ ആവേശത്തോടെയാണ് പരമ്പരയെ ഉറ്റുനോക്കുന്നതെന്നും പാക്കിസ്ഥാന്‍ യുവ പേസര്‍ വ്യക്തമാക്കി.

സ്ക്വാഡിനകത്ത് തന്നെയുള്ള പരിശീലന മത്സരങ്ങളുമായി ഈ അവസരം തങ്ങള്‍ വിനിയോഗിക്കുമെന്നും ഇത്തരം ക്രമീകരണം ഒരുക്കിയ പാക്കിസ്ഥാന്‍ ബോര്‍ഡിന്റെ നീക്കം പ്രോത്സാഹനപരമാണെന്നും യുവ താരം വ്യക്തമാക്കി. 2016ല്‍ ടെസ്റ്റ് പരമ്പര ഡ്രോ ആകുകയായിരുന്നുവെന്നതിനാല്‍ തന്നെ ഇംഗ്ലണ്ടിലെ സാഹചര്യങ്ങളില്‍ മികച്ച പ്രകടനം പുറത്തെടുക്കുവാന്‍ പാക്കിസ്ഥാന് കഴിയാറുണ്ടെന്നും അതിനാല്‍ തന്നെ ഇത്തവണ വിജയം കൈപ്പിടിയിലൊതുക്കുവാനാകുമെന്നും ടീം വ്യക്തമാക്കി.