രഞ്ജി ട്രോഫിയില്‍ കേരളത്തിനെതിരെ കളിക്കുവാന്‍ ബിസിസിഐ മുഹമ്മദ് ഷമിയ്ക്ക് അനുമതി നല്‍കുമ്പോള്‍ ആവശ്യപ്പെട്ടിരുന്ന കാര്യം ഒരിന്നിംഗ്സില്‍ 15ലധികം ഓവറുകള്‍ എറിയരുതെന്നാണ്. മത്സരത്തിന്റെ സാഹചര്യമനുസരിച്ച് മൂന്നോ നാലോ ഓവറുകള്‍ അധികം എറിയുന്നത് വരെ അനുവദനീയമാണെന്ന് ബിസിസിഐ കൃത്യമായ നിര്‍ദ്ദേശം കൊടുത്തിരിക്കുന്നു. ഓസ്ട്രേലിയയില്‍ ടെസ്റ്റ് പരമ്പരയില്‍ ഇന്ത്യയുടെ പരമ്പര വിജയ സാധ്യതകളെ ബാധിക്കാതിരിക്കുവാനായി ടെസ്റ്റ് താരങ്ങളുടെ വര്‍ക്ക് ലോഡ് മാനേജ്മെന്റ് ചെയ്യുന്നതിനായിരുന്നു ഈ നിര്‍ദ്ദേശം.
എന്നാല്‍ കേരളത്തിന്റെ ഒന്നാം ഇന്നിംഗ്സ് അവസാനിക്കുമ്പോള്‍ മുഹമ്മദ് ഷമി 26 ഓവറുകളാണ് എറിഞ്ഞത്. അനുവദനീയമായ അളവിലും ഏറെ അധികം ഓവറുകള്‍ താരം എറിഞ്ഞതിനു എന്ത് വിശദീകരണമാവും ഷമിയും ടീം മാനേജ്മെന്റും ബിസിസിഐയ്ക്ക് നല്‍കുന്നതെന്നാവും വരും ദിവസങ്ങളില്‍ ഇന്ത്യന്‍ ക്രിക്കറ്റ് ലോകം ഉറ്റുനോക്കുന്നത്.
