ഗൗതം ഗംഭീറിനെതിരെ രൂക്ഷ വിമർശനവുമായി അജിങ്ക്യ രഹാനെ

സ്വന്തം നാട്ടിൽ ന്യൂസിലൻഡിനെതിരെ നടന്ന ഏകദിന പരമ്പരയിൽ ഇന്ത്യ 1-2 ന് പരാജയപ്പെട്ടതിന് പിന്നാലെ പരിശീലകൻ ഗൗതം ഗംഭീറിനെതിരെ രൂക്ഷവിമർശനവുമായി മുതിർന്ന താരം അജിങ്ക്യ രഹാനെ രംഗത്തെത്തി. പരമ്പരയിലെ ആദ്യ മത്സരത്തിൽ വിജയിച്ച് 1-0 ന് മുന്നിലായിരുന്നിട്ടും അവസാന രണ്ട് മത്സരങ്ങളിൽ പരാജയപ്പെട്ടത് ഇന്ത്യൻ ടീമിന് വലിയ തിരിച്ചടിയായി.

ഇൻഡോറിൽ നടന്ന നിർണ്ണായകമായ മൂന്നാം ഏകദിനത്തിൽ 338 റൺസ് പിന്തുടർന്ന ഇന്ത്യയ്ക്ക്, വിരാട് കോഹ്‌ലിയുടെ തകർപ്പൻ സെഞ്ച്വറിക്ക് (124) ശേഷവും 41 റൺസിന് തോൽവി സമ്മതിക്കേണ്ടി വന്നു. ന്യൂസിലൻഡിനോട് സ്വന്തം മണ്ണിൽ ഇന്ത്യ വഴങ്ങുന്ന ആദ്യ ഏകദിന പരമ്പരയാണിതെന്നത് തോൽവിയുടെ ആഘാതം വർദ്ധിപ്പിക്കുന്നു.

ശ്രീലങ്കയ്ക്കും ഓസ്‌ട്രേലിയയ്ക്കും പിന്നാലെ ഗംഭീറിന് കീഴിൽ ഇന്ത്യ നേരിടുന്ന മൂന്നാമത്തെ ഏകദിന പരമ്പര തോൽവിയാണിത്. ടീമിലെ കളിക്കാരെ അടിക്കടി മാറ്റുന്നതും സ്ഥിരതയില്ലാത്ത പരീക്ഷണങ്ങളുമാണ് തോൽവിക്ക് പ്രധാന കാരണമെന്ന് രഹാനെ ചൂണ്ടിക്കാട്ടി. അവസാന ഒൻപത് ഏകദിനങ്ങളിൽ അഞ്ചിലും ഇന്ത്യ പരാജയപ്പെട്ട സാഹചര്യത്തിൽ ഗൗതം ഗംഭീർ കടുത്ത ചോദ്യങ്ങളെ നേരിടേണ്ടി വരുമെന്ന് അദ്ദേഹം പറഞ്ഞു.

2027-ലെ ലോകകപ്പിനായി ടീമിനെ ഒരുക്കുമ്പോൾ കളിക്കാർക്ക് മാനേജ്‌മെന്റിൽ നിന്ന് കൃത്യമായ പിന്തുണയും വ്യക്തതയുമാണ് ലഭിക്കേണ്ടത്. ഏകദേശം ഒരു രണ്ടാം നിര ടീമുമായി എത്തിയ ന്യൂസിലൻഡിനെതിരെ ഇന്ത്യ 3-0 ന് വിജയിക്കുമെന്നാണ് ആരാധകർ കരുതിയതെന്നും എന്നാൽ അമിതമായ മാറ്റങ്ങൾ തിരിച്ചടിയായെന്നും രഹാനെ ക്രിക്ബസിനോട് സംസാരിക്കവെ വ്യക്തമാക്കി.