ഡാരെന്‍ സാമി ടീമിനെ നയിക്കുമെന്ന് പേഷ്വാര്‍ സല്‍മി ഉടമ

തുടര്‍ച്ചയായ മൂന്നാം സീസണിലും പേഷ്വാര്‍ സല്‍മിയെ വിന്‍ഡീസ് താരം ഡാരെന്‍ സാമി നയിക്കുമെന്ന് ഫ്രാഞ്ചൈസി ഉടമ ജാവേദ് അഫ്രീദി. 2017 സീസണില്‍ ആദ്യമായി ടീമിന്റെ നായക സ്ഥാനത്തെത്തിയ ഡാരെന്‍ സാമി പാക്കിസ്ഥാനില്‍ ഏറെ ആരാധകരുള്ള താരമാണ്. പാക്കിസ്ഥാനില്‍ ക്രിക്കറ്റ് കളിക്കുവാന്‍ സന്നദ്ധ പ്രകടിപ്പിച്ച താരം രണ്ട് തവണ ക്രിക്കറ്റിനായി പാക്കിസ്ഥാനിലേക്ക് എത്തുകയും ചെയ്തു.

കഴിഞ്ഞ രണ്ട് സീസണുകളില്‍ ടീമിനെ ഫൈനലിലേക്ക് നയിച്ച ഡാരെന്‍ സാമി ഒരു തവണ സല്‍മിയെ വിജയ കിരീടത്തിലേക്ക് എത്തിക്കുകയും ചെയ്തു. ഈ വര്‍ഷം നടന്ന ഫൈനലില്‍ ഇസ്ലാമാബാദ് യുണൈറ്റഡിനോടു നേരിയ വ്യത്യാസത്തിലാണ് ടീം പരാജയപ്പെട്ടത്. കിരീടം നിലനിര്‍ത്തുകയെന്ന ലക്ഷ്യത്തില്‍ ടീം പരാജയപ്പെട്ടെങ്കിലും ഈ സീസണിലും സാമി തന്നെ ടീമിനെ നയിക്കുകയായിരുന്നു.