വെസ്റ്റിൻഡീസ് ടീമിന്റെ ഏകദിന ടീമിന്റെയും ടി20 ടീമിന്റെയും ക്യാപ്റ്റനായി ഓൾ റൗണ്ടർ പൊള്ളാർഡിനെ നിയമിച്ചു. നിലവിൽ ഏകദിന ടീമിന്റെ ക്യാപ്റ്റൻ ജേസൺ ഹോൾഡറും ടി20 ടീമിന്റെ ക്യാപ്റ്റൻ കാർലോസ് ബ്രത് വൈറ്റുമാണ്. ഏകദിന ടീമിന്റെ ക്യാപ്റ്റനായി പൊള്ളാർഡിനെ നിയമിച്ചെങ്കിലും താരം 2016ന് ശേഷം ഒരു ഏകദിനം പോലും കളിച്ചിട്ടില്ല. വെസ്റ്റിൻഡീസിന് വേണ്ടി 101 ഏകദിന മത്സരങ്ങൾ കളിച്ച പൊള്ളാർഡ് 2289 റൺസും 50 വിക്കറ്റും നേടിയിട്ടുണ്ട്.
ലോകകപ്പിലെ മോശം പ്രകടനം ഇന്ത്യക്കെതിരെയുള്ള പരമ്പരയിലും തുടർന്നതോടെയാണ് പുതിയ ക്യാപ്റ്റനെ തിരഞ്ഞെടുക്കാൻ വെസ്റ്റിൻഡീസ് ക്രിക്കറ്റ് തീരുമാനിച്ചത്. 10 ടീമുകൾ പങ്കെടുത്ത ലോകകപ്പിൽ വെസ്റ്റിൻഡീസ് ഒൻപതാം സ്ഥാനത്താണ് എത്തിയത്. രണ്ട് മത്സരങ്ങൾ മാത്രമാണ് വെസ്റ്റിൻഡീസ് ലോകകപ്പിൽ ജയിച്ചത്. ഇന്ത്യക്കെതിരെയുള്ള പരമ്പരയിൽ ഒരു മത്സരം പോലും ജയിക്കാൻ വെസ്റ്റിൻഡീസിനായിരുന്നില്ല. വെസ്റ്റിൻഡീസിനെ അടുത്ത പരമ്പര അഫ്ഗാനിസ്ഥാനെതിരെയാണ്. പരമ്പരയിൽ 3 ഏകദിന മത്സരങ്ങളും 3 ടി20 മത്സരങ്ങളും ഒരു ടെസ്റ്റ് മത്സരവും അഫ്ഗാനിസ്ഥാനെതിരെ വെസ്റ്റിൻഡീസ് കളിക്കും.
