പരിക്ക് കാരണം വിശ്രമത്തിൽ ഉള്ള ഓസ്ട്രേലിയ ക്യാപ്റ്റൻ കമ്മിൻസ് ലോകകപ്പിന് മുന്നോടിയായി സെപ്റ്റംബർ അവസാനം ഇന്ത്യയ്‌ക്കെതിരെ നടക്കുന്ന മൂന്ന് മത്സരങ്ങളുടെ ഏകദിന പരമ്പരയിൽ അന്താരാഷ്ട്ര ക്രിക്കറ്റിലേക്ക് മടങ്ങിവരാൻ ആഗ്രഹിക്കുന്നുവെന്ന് പറഞ്ഞു. ഓവലിൽ അഞ്ചാം ആഷസ് ടെസ്റ്റിനിടെ ആയിരുന്നു കമ്മിൻസിന്റെ കൈത്തണ്ടയ്ക്ക് പരിക്കേറ്റത്. കമ്മിൻസിന് ആറാഴ്ചത്തെ വിശ്രമം നിർദ്ദേശിച്ചിട്ടുണ്ട്.
സെപ്റ്റംബർ 7 നും 17 നും ഇടയിൽ നടക്കുന്ന ദക്ഷിണാഫ്രിക്കയ്‌ക്കെതിരായ ഓസ്‌ട്രേലിയയുടെ അഞ്ച് മത്സര ഏകദിന പരമ്പരയിൽ പേസ് ബൗളർ കളിക്കില്ല. “ഞാൻ ലോകകപ്പിന് മുന്നോടിയായുള്ള ഇന്ത്യയ്‌ക്കെതിരായ ഏകദിന മത്സരങ്ങളിലേക്കാണ് ഉറ്റു നോക്കുന്നത്. ഈ പരിക്ക് വളരെ മോശമല്ല എന്ന് താൻ വിശ്വസിക്കുന്നു. കുറച്ച് ആഴ്‌ചകൾ കൊണ്ട് അത് ശരിയാകും,” കമ്മിൻസ് പറഞ്ഞു.
ഒക്‌ടോബർ 5 മുതൽ നവംബർ 19 വരെ ഇന്ത്യയിൽ നടക്കുന്ന ലോകകപ്പിൽ താൻ കളിക്കുമെന്ന് പ്രതീക്ഷിക്കുന്നതായി കമ്മിൻസ് പറഞ്ഞു. ലോകകപ്പിന് ശേഷം ഏകദിന ക്യാപ്റ്റൻ എന്ന നിലയിൽ തന്റെ പങ്ക് വിലയിരുത്തുമെന്ന് കമ്മിൻസ് പറഞ്ഞു.
