ഐപിഎല്ലിനായി പിഎസ്എൽ കരാർ ലംഘിച്ചു; സിംബാബ്‌വെ താരം മുസരബാനിക്കെതിരെ നിയമനടപടിക്കൊരുങ്ങി പിസിബി

പാകിസ്ഥാൻ സൂപ്പർ ലീഗിലെ (പിഎസ്എൽ) ഇസ്ലാമാബാദ് യുണൈറ്റഡുമായുള്ള കരാർ ഉപേക്ഷിച്ച് ഐപിഎല്ലിൽ കൊൽക്കത്ത നൈറ്റ് റൈഡേഴ്സിൽ ചേരാനുള്ള സിംബാബ്‌വെ പേസർ ബ്ലെസിംഗ് മുസരബാനിയുടെ തീരുമാനം വലിയ വിവാദത്തിന് തിരി കൊളുത്തിയിരിക്കുകയാണ്. ഷമർ ജോസഫിന് പകരക്കാരനായി 1.1 കോടി രൂപയ്ക്കാണ് ഇസ്ലാമാബാദ് യുണൈറ്റഡ് മുസരബാനിയെ ടീമിലെത്തിച്ചിരുന്നത്.

എന്നാൽ അവസാന നിമിഷം ഐപിഎല്ലിൽ നിന്ന് ക്ഷണം ലഭിച്ചതോടെ താരം പിഎസ്എൽ കരാറിൽ നിന്ന് പിന്മാറുകയായിരുന്നു. കരാർ ലംഘനം നടത്തിയ താരത്തിനെതിരെ ശക്തമായ നിയമനടപടികൾ സ്വീകരിക്കാനാണ് പാകിസ്ഥാൻ ക്രിക്കറ്റ് ബോർഡിന്റെ (പിസിബി) തീരുമാനം.
കഴിഞ്ഞ സീസണിൽ ദക്ഷിണാഫ്രിക്കൻ താരം കോർബിൻ ബോഷ് സമാനമായ രീതിയിൽ പിഎസ്എൽ ഉപേക്ഷിച്ച് ഐപിഎല്ലിലേക്ക് പോയതിനെത്തുടർന്ന് താരത്തിന് ഒരു വർഷത്തെ വിലക്ക് ഏർപ്പെടുത്തിയിരുന്നു.

ഇതിന് പിന്നാലെയാണ് മുസരബാനിയും ഇതേ വഴി തിരഞ്ഞെടുക്കുന്നത്. അടുത്തിടെ നടന്ന ടി20 ലോകകപ്പിൽ ആറ് മത്സരങ്ങളിൽ നിന്ന് 13 വിക്കറ്റുകൾ വീഴ്ത്തി സിംബാബ്‌വെയെ സൂപ്പർ എയിറ്റിൽ എത്തിക്കുന്നതിൽ നിർണ്ണായക പങ്കുവഹിച്ചതാണ് മുസരബാനിയെ ഐപിഎൽ ടീമുകളുടെ ശ്രദ്ധാകേന്ദ്രമാക്കിയത്. ലോകകപ്പിൽ ഓസ്‌ട്രേലിയക്കെതിരെ താരം നാല് വിക്കറ്റ് പ്രകടനം നടത്തിയിരുന്നു.

ബംഗ്ലാദേശ് താരം മുസ്തഫിസുർ റഹ്മാന് പകരക്കാരനായാണ് കൊൽക്കത്ത നൈറ്റ് റൈഡേഴ്സ് മുസരബാനിയെ ടീമിലെടുത്തത്. ഐപിഎൽ നൽകുന്ന വലിയ സാമ്പത്തിക ലാഭവും പ്രശസ്തിയും കളിക്കാരെ ആകർഷിക്കുന്നുണ്ടെങ്കിലും, നിലവിലുള്ള കരാറുകൾ ലംഘിക്കുന്നത് ലീഗുകളുടെ വിശ്വാസ്യതയെ ബാധിക്കുമെന്നാണ് പിസിബിയുടെ നിലപാട്. മാർച്ച് 26-ന് പിഎസ്എൽ ആരംഭിക്കാനിരിക്കെ, മുസരബാനിയുടെ ഈ കൂടുമാറ്റം ഇസ്ലാമാബാദ് യുണൈറ്റഡിന് വലിയ തിരിച്ചടിയായിട്ടുണ്ട്. വരും ദിവസങ്ങളിൽ ഈ വിഷയത്തിൽ മുസരബാനിക്കെതിരെ പിസിബി കടുത്ത അച്ചടക്ക നടപടികൾ സ്വീകരിക്കാനാണ് സാധ്യത.