പൃഥ്വി ഷാ ക്രിക്കറ്റ് ഓസ്ട്രേലിയയ്ക്കെതിരെയുള്ള തന്റെ 66 റണ്‍സിലൂടെ തന്നെ അഡിലെയിഡ് ടെസ്റ്റിലെ ഓപ്പണിംഗ് സ്ഥാനം ഉറപ്പിച്ചുവെന്ന് ഇന്ത്യയുടെ ബാറ്റിംഗ് കോച്ച് സഞ്ജയ് ബംഗാര്‍ കഴിഞ്ഞ ദിവസം പറഞ്ഞുറപ്പിച്ചതായിരുന്നു. എന്നാല്‍ മത്സരത്തിന്റെ മൂന്നാം ദിവസം താരം ഫീല്‍ഡിംഗിനിടെ പരിക്കേറ്റതോടെ ഓപ്പണിംഗിലെ പ്രതിസന്ധി കൂടാതെ ബാക്കപ്പ് ഓപ്പണറെ കൂടി തേടേണ്ട സ്ഥിതിയിലാണ് ഇന്ത്യ.
ഇന്ത്യയുടെ രണ്ടാം ഓപ്പണിംഗ് സ്ലോട്ടിലേക്ക് ശ്രമം തുടരുന്ന കെഎല്‍ രാഹുലും മുരളി വിജയ്‍യും ഇനി അഡിലെയ്ഡില്‍ ഓപ്പണ്‍ ചെയ്യുകയാണെങ്കില്‍ ഷായുടെ പരിക്ക് ഗുരുതരമാണെങ്കില്‍ താരത്തിനു പകരക്കാരനെ കണ്ടെത്തേണ്ട ചുമതല കൂടി ഇന്ത്യയ്ക്കുണ്ട്. മയാംഗ് അഗര്‍വാലും ശിഖര്‍ ധവാനും ആവും ടീമിലേക്ക് പകരക്കാരനായി എത്തുവാനുള്ള സാധ്യത.
ശിഖര്‍ ധവാനെ അടുത്തിടെ ടെസ്റ്റില്‍ നിന്ന് ഒഴിവാക്കിയതാണെങ്കിലും പുതുമുഖ താരം അഗര്‍വാലിനെക്കാള്‍ കൂടുതല്‍ സാധ്യത താരത്തിനാകുമെന്ന് വേണം വിലയിരുത്തുവാന്‍. ഓസ്ട്രേലിയയിലെ പിച്ചുകളില്‍ മയാംഗിനെക്കാള്‍ ഒരു സീനിയര്‍ താരത്തെ കരുതലായി എത്തിക്കുവാനാകും ടീം മാനേജ്മെന്റ് ആഗ്രഹപ്പെടുക.
പൃഥ്വിയുടെ പരിക്ക് സാരമല്ലെന്നും താരം അഡിലെയ്ഡില്‍ കളിയ്ക്കാനിറങ്ങുമെന്നുമുള്ള വാര്‍ത്തയ്ക്കായാവും ടീം മാനേജ്മെന്റും കായികാരാധകരും കാത്തിരിക്കുന്നതെന്ന് തീര്‍ച്ചയാണ്.
