ടി20 ലോകകപ്പിലെ വിരാട് കോഹ്ലിയുടെ ഫോമിൽ ഒരു ആശങ്കയും ടീമിന് ഇല്ല എന്ന് ഇന്ത്യൻ ക്യാപ്റ്റൻ രോഹിത് ശർമ്മ. ഇന്ന് വിരാട് കോഹ്ലി 9 റൺസ് മാത്രമെ എടുത്തിരുന്നുള്ളൂ. ഈ ലോകകപ്പിൽ ഒരു ഫിഫ്റ്റി പോലും കോഹ്ലിക്ക് നേടാൻ ആയിട്ടില്ല. എന്നാൽ കോഹ്ലിയുടെ ഫോമിനെ കുറിച്ച് പേടിക്കേണ്ട എന്നും കോഹ്ലി തന്റെ ഇന്നിങ്സ് ഫൈനലിനായി മാറ്റിവെച്ചതായിരിക്കും എന്നും രോഹിത് ഇന്ന് മത്സരശേഷം പറഞ്ഞു.
“കോഹ്ലി നിലവാരമുള്ള കളിക്കാരനാണ്. ഏതൊരു കളിക്കാരനും ഇതുപോലുള്ള അവസ്ഥയിലൂടെ കടന്നുപോകാം. അവൻ്റെ ക്ലാസും പ്രാധാന്യവും ഞങ്ങൾ മനസ്സിലാക്കുന്നുണ്ട്. ഫോം ഒരിക്കലും ഒരു പ്രശ്നമല്ല.” രോഹിത് പറഞ്ഞു.
“കോഹ്ലിയുടെ ബാറ്റിംഗിൽ ഇന്റന്റ് നിങ്ങൾക്ക് കാണാം.. തീർച്ചയായും അവന്റെ ഇന്നിംഗ്സ് വരും. ഫൈനൽ മത്സരത്തിലാകും അത്. കോഹ്ലി ചിലപ്പോൾ ഫൈനലിനായി ആ ഇന്നിംഗ്സ് കാത്തുവെച്ചതാകാം.” ഒരു ചിരിയോടെ രോഹിത് ശർമ്മ പറഞ്ഞു.
“ഒരു ടീം എന്ന നിലയിൽ ഞങ്ങൾ ഇന്ന് വളരെ ശാന്തരായിരുന്നു. നല്ല ക്രിക്കറ്റ് കളിക്കണം. അതാണ് ഫൈനലിൽ ഞങ്ങൾ ചെയ്യാൻ ആഗ്രഹിക്കുന്നത്.” രോഹിത് പറഞ്ഞു.
