ലഖ്‌നൗവിൽ നടന്ന രണ്ടാമത്തെ അനൗദ്യോഗിക ടെസ്റ്റ് മത്സരത്തിൽ ഓസ്‌ട്രേലിയ എ ക്കെതിരെ കെ എൽ രാഹുലിന്റെ (KL Rahul) അപരാജിത സെഞ്ച്വറിയുടെ (176) മികവിൽ ഇന്ത്യ എ ക്ക് ആവേശകരമായ 5 വിക്കറ്റ് വിജയം. ഓസ്‌ട്രേലിയ എ മുന്നോട്ടുവെച്ച 412 റൺസ് എന്ന ദുർഘടമായ വിജയലക്ഷ്യം പിന്തുടർന്ന ഇന്ത്യ എ ക്ക് രാഹുലിന്റെ ഇന്നിംഗ്സ് കരുത്തായി.
സായി സുദർശന്റെ നിർണായക സെഞ്ച്വറിയും ധ്രുവ് ജുറേൽ, നിതീഷ് കുമാർ റെഡ്ഡി എന്നിവരുടെ സംഭാവനകളും ചേർന്നപ്പോൾ ഇന്ത്യ 413-5 എന്ന സ്കോറിലെത്തി, ശ്രദ്ധേയമായ വിജയം സ്വന്തമാക്കി.
ഓസ്‌ട്രേലിയ എ യുടെ ആദ്യ ഇന്നിംഗ്സ് സ്കോറായ 420-ന് കളി അവർക്ക് അനുകൂലമാകും എന്ന് തോന്നിപ്പിച്ചിരുന്നു. ഇന്ത്യ ആദ്യ ഇന്നിംഗ്സിൽ 194ന് പുറത്താവുകയും ചെയ്തിരുന്നു. ഇന്ത്യ അവിടെ നിന്ന് മികച്ച തിരിച്ചുവരവാണ് നടത്തിയത്.
രാഹുലിന്റെ പോരാട്ടത്തിനൊപ്പം ഇന്ത്യ എ യുടെ ബൗളർമാരും നിർണായക പങ്ക് വഹിച്ചു. മാനവ് സുതാറും ഗുർനൂർ ബ്രാറും പ്രധാന വിക്കറ്റുകൾ വീഴ്ത്തി ഓസ്‌ട്രേലിയ എ യുടെ രണ്ടാം ഇന്നിംഗ്സ് 185 റൺസിന് അവസാനിപ്പിച്ചത് ആവേശകരമായ ക്ലൈമാക്സിന് വഴിയൊരുക്കി. 16 ബൗണ്ടറികളും 4 സിക്സറുകളും ഉൾപ്പെട്ട രാഹുലിന്റെ ഇന്നിംഗ്സ്, മികച്ച സ്ട്രൈക്ക് റേറ്റ് നിലനിർത്തി ഇന്ത്യയെ നിയന്ത്രിച്ചു.
