ശുഭ്മന്‍ ഗില്ലിനെ വാനോളം പുകഴ്ത്തി മൊഹമ്മദ് കൈഫ്. ചട്ടോഗ്രാമിലെ ആദ്യ ടെസ്റ്റിൽ തന്റെ കന്നി ടെസ്റ്റ് ശതകം ഗിൽ നേടിയിരുന്നു. ആദ്യ ടെസ്റ്റിൽ 188 റൺസിന്റെ മികച്ച വിജയം ആണ് ഇന്ത്യ നേടിയത്. 110 റൺസാണ് ശുഭ്മന്‍ ഗിൽ നേടിയത്.
രോഹിത് ശര്‍മ്മയുടെ പരിക്കാണ് ഗില്ലിന് അവസരമായി മാറിയത്. ചേതേശ്വര്‍ പുജാരയോടൊപ്പം ഇന്ത്യയുടെ ഇന്നിംഗ്സിനെ മുന്നോട്ട് നയിക്കുവാന്‍ ഗില്ലിന് സാധിച്ചപ്പോള്‍ 513 റൺസ് വിജയ ലക്ഷ്യമാണ് ഇന്ത്യന്‍ ടീം ബംഗ്ലാദേശിന് മുന്നിൽ വെച്ചത്.
ഇന്ത്യന്‍ ടീമിൽ നിന്ന് ഏറെക്കാലം ഗില്ലിനെ മാറ്റി നിര്‍ത്തുവാന്‍ സാധിക്കുകയില്ലെന്നാണ് കൈഫ് പ്രതികരിച്ചത്. താരം ഇത്തരം ഇന്നിംഗ്സുകള്‍ പുറത്തെടുക്കുമ്പോള്‍ ഇന്ത്യയ്ക്ക് എത്ര കാലം താരത്തെ പ്ലേയിംഗ് കോമ്പിനേഷനുകളിൽ നിന്ന് മാറ്റി നിര്‍ത്താനാകുമെന്നും കൈഫ് ചോദിച്ചു.
രോഹിത് തിരിച്ചു വരുമ്പോള്‍ ഗില്ലിന് സ്ഥാനത്തിനായി കെഎൽ രാഹുലിനെയോ ശ്രേയസ്സ് അയ്യരെയോ പുറത്തിരുത്തേണ്ടി വന്നാലും ഗില്ലിന് അവസരം കൊടുക്കണമെന്നാണ് താന്‍ പറയുന്നതെന്നും കൈഫ് കൂട്ടിചേര്‍ത്തു.
