ടോസ് പോലും നടക്കാതെ ഉപേക്ഷിക്കപ്പെട്ട ആദ്യ ടി20യ്ക്ക് ശേഷം രണ്ടാം ടി20യിലും മഴ കളി തടസപ്പെടുത്തിയപ്പോള്‍ 13 ഓവറാക്കി ചുരുക്കിയ മത്സരത്തില്‍ സിംബാബ്‍വേയ്ക്കെതിരെ 9 വിക്കറ്റ് വിജയം കുറിച്ച് അയര്‍ലണ്ട്. ഇന്നലെ നടന്ന മത്സരത്തില്‍ ആദ്യം ബാറ്റ് ചെയ്ത സിംബാബ്‍വേ 13 ഓവറില്‍ 132/8 എന്ന മികച്ച സ്കോറാണ് നേടിയത്. 32 പന്തില്‍ 55 റണ്‍സ് നേടിയ ക്രെയിഗ് ഇര്‍വിനെയും 12 പന്തില്‍ നിന്ന് 34 റണ്‍സ് നേടിയ ഷോണ്‍ വില്യംസിന്റെയും പ്രകടനങ്ങളാണ് സിംബാബ്‍വേയെ 132 റണ്‍സിലേക്ക് നയിച്ചത്. അയര്‍ലണ്ടിന് വേണ്ടി മാര്‍ക്ക് അഡൈര്‍ 4 വിക്കറ്റ് നേടിയെങ്കിലും 40 റണ്‍സാണ് മൂന്നോവറില്‍ നിന്ന് വഴങ്ങിയത്. ക്രെയിഗ് യംഗ് 2 വിക്കറ്റ് നേടി.
മറുപടി ബാറ്റിംഗിനിറങ്ങിയ അയര്‍ലണ്ടിനെ പോള്‍ സ്റ്റിര്‍ലിംഗിന്റെ വെടിക്കെട്ട് പ്രകടനമാണ് വിജയത്തിലേക്ക് നയിച്ചത്. 10.5 ഓവറില്‍ ഒരു വിക്കറ്റ് നഷ്ടത്തിലാണ് അയര്‍ലണ്ടിന്റെ വിജയം. 36 പന്തില്‍ നിന്ന് 83 റണ്‍സാണ് പോള്‍ സ്റ്റിര്‍ലിംഗ് നേടിയത്. 6 ഫോറും 7 സിക്സും നേടിയാണ് താരം പുറത്താകാതെ നിന്നത്. അതേ സമയം കെവിന്‍ ഒബ്രൈന്‍ 19 റണ്‍സ് നേടി പുറത്തായപ്പോള്‍ ആന്‍ഡ്രൂ ബാല്‍ബിര്‍ണേ 28 റണ്‍സ് നേടി പുറത്താകാതെ നിന്നു. ടെണ്ടായി ചതാരയ്ക്കാണ് ഇന്നിംഗ്സിലെ ഏക വിക്കറ്റ് ലഭിച്ചത്.
