2020 ഇന്ത്യൻ പ്രീമിയർ ലീഗ് സീസണിലേക്ക് ഇംഗ്ലണ്ടിനെ ലോകകപ്പ് വിജയത്തിലേക്ക് നയിച്ച പരിശീലകൻ ട്രെവർ ബേലിസ്സിനെ സ്വന്തമാക്കി സൺറൈസേഴ്സ് ഹൈദരാബാദ്. ആഷസ് പരമ്പരക്ക് ശേഷം ഇംഗ്ലണ്ട് ടീമിന്റെ കൂടെ തന്റെ കരാർ കഴിയുന്നതോടെ ബേലിസ് സൺറൈസേഴ്സിന്റെ പരിശീലകനായി ചുമതലയേൽക്കും. ഓസ്‌ട്രേലിയൻ പരിശീലകൻ ടോം മൂഡിയുടെ പകരക്കാരനായാണ് ബേലിസ് എത്തുന്നത്.
ടോം മൂഡിക്ക് കീഴിൽ സൺറൈസേഴ്സ് ഹൈദരാബാദ് കഴിഞ്ഞ തവണ പ്ലേ ഓഫിൽ എത്തിയിരുന്നു. നേരത്തെ മറ്റൊരു ഇന്ത്യൻ പ്രീമിയർ ലീഗ് ക്ലബായ കൊൽക്കത്ത നൈറ്റ് റൈഡേഴ്സിന്റെ പരിശീലകനായും ബേലിസ് പ്രവർത്തിച്ചിട്ടുണ്ട്. ബേലിസിന് കീഴിൽ 2012ലും 2014ലും കൊൽക്കത്ത നൈറ്റ്റൈഡേഴ്‌സ് ഇന്ത്യൻ പ്രീമിയർ ലീഗ് കിരീടം സ്വന്തമാക്കിയിരുന്നു. കൊൽക്കത്തയെ കൂടാതെ ബിഗ് ബാഷ് ലീഗിൽ സിഡ്‌നി സിക്സേഴ്സിനെയും ശ്രീലങ്കൻ ദേശീയ ടീമിനെയും ബേലിസ് പരിശീലിപ്പിച്ചിട്ടുണ്ട്. 2015 മുതൽ ബേലിസ് ഇംഗ്ലണ്ട് ടീമിന്റെ പരിശീലകനാണ്.
