ടി20 ലോകകപ്പ് ഫൈനൽ ആണ് ഇന്ന്. ഇന്ത്യ കിരീടം തേടി ദക്ഷിണാഫ്രിക്കയെ നേരിടുന്നു. ബാർബദോസിൽ നടക്കുന്ന മത്സരം ഇന്ന് പ്രാദേശിക സമയം രാവിലെ 10.30നാകും ആരംഭിക്കുക. ഇന്ത്യ സമയം രാത്രി 8 മണിക്കും. കളി തത്സമയം സ്റ്റാർ സ്പോർട്സിലും ഹോട്സ്റ്റാറിലും കാണാം.
ഒരു ആവേശകരമായ ഫൈനൽ തന്നെ ഇന്ന് ഏവരും പ്രതീക്ഷിക്കുന്നു. ഈ ടൂർണമെന്റിൽ ഒരു മത്സരം പോലും പരാജയപ്പെടാത്ത രണ്ടു ടീമുകൾ ആണ് നേർക്കുനേർ വരുന്നത്. രണ്ടും അത്ര മികച്ച ഫോമിൽ ഉള്ള ടീമുകൾ. ഇന്ത്യ സെമി ഫൈനലിൽ നിലവിലെ ചാമ്പ്യന്മാരായ ഇംഗ്ലണ്ടിനെ മറികടന്നാണ് ഫൈനലിൽ എത്തിയത്. ദക്ഷിണാഫ്രിക്ക അഫ്ഗാനിസ്ഥാനെ തകർത്തു കൊണ്ടും.
ദക്ഷിണാഫ്രിക്ക അവരുടെ ചരിത്രത്തിലെ ആദ്യ ലോകകപ്പ് ആണ് ലക്ഷ്യമിടുന്നത്. ഇന്ത്യക്ക് ഇന്ന് ലോകകപ്പ് നേടാൻ ആയാൽ അത് ഇന്ത്യയുടെ നാലാം ലോകകപ്പ് ആകും. ടി20 ലോകകപ്പിന്റെ ആദ്യ എഡിഷനിൽ കിരീടം നേടിയ ഇന്ത്യക്ക് ഇന്ന് കിരീടം ഉയർത്താൻ ആയാൽ അത് രണ്ടാം ടി20 ലോകകിരീടം ആകും.
ഇന്ന് ഫൈനലിന് ഇറങ്ങുമ്പോൾ വിരാട് കോഹ്ലി, ശിവം ദൂബെ, ജഡേജ എന്നിവരുടെ ഫോം മാത്രം ഇന്ത്യയുടെ ആശങ്ക. എന്നാലും ഇവർ മൂന്നു പേരും ആദ്യ ഇലവനിൽ തുടരാൻ തന്നെയാണ് സാധ്യത. ദക്ഷിണാഫ്രിക്ക ഇന്ത്യക്ക് വലിയ വെല്ലുവിളി തന്നെ ഉയർത്തും. മികച്ച ഫോമിലുള്ള ഷംസിയുടെ ബൗളിംഗ് ആകും ഇന്ത്യ ഏറ്റവും ആശങ്കയോടെ നോക്കുന്നത്.
