ഇന്ത്യ കൊലമാസ്സ്! , ത്രില്ലറിൽ വെസ്റ്റിൻഡീസിനെ തോൽപ്പിച്ച് പരമ്പര സ്വന്തം

Photo: Twitter/@BCCI

ത്രില്ലറിൽ വെസ്റ്റിൻഡീസിനെ മറികടന്ന് ജയം 4 വിക്കറ്റ് ജയം സ്വന്തമാക്കി ഇന്ത്യ. വെസ്റ്റിൻഡീസ് മുൻപിൽ വെച്ച 316 എന്ന കൂറ്റൻ ലക്‌ഷ്യം 8 പന്ത് ബാക്കി നിൽക്കെ മറികടന്നാണ് ഇന്ത്യ ജയം സ്വന്തമാക്കിയത്. ജയത്തോടെ മൂന്ന് മത്സരങ്ങളുള്ള പരമ്പര 2-1ന് സ്വന്തമാക്കാനും ഇന്ത്യക്കായി.

ഒരു ഘട്ടത്തിൽ മത്സരത്തിൽ ഇന്ത്യ ശക്തമായ നിലയിലായിരുന്നു. എന്നാൽ തുടർച്ചയായി നാല് വിക്കറ്റുകൾ നഷ്ടപ്പെടുകയും തുടർന്ന് പൊരുതി നോക്കിയ വിരാട് കോഹ്‌ലിയും പുറത്തായതോടെ ഇന്ത്യ തോൽവി നോക്കി കണ്ടിരുന്നു. എന്നാൽ അവസാന ഓവറുകളിൽ പൊരുതി നിന്ന ജഡേജയും ശർദൂൽ താക്കൂറും ഇന്ത്യക്ക് ജയം നേടികൊടുക്കുകയായിരുന്നു.

ഇന്ത്യക്ക് വേണ്ടി കെ.എൽ രാഹുലും രോഹിത് ശർമ്മയും മികച്ച തുടക്കമാണ് നൽകിയത്. തുടർന്ന് രോഹിത് ശർമ്മ പുറത്തായെങ്കിലും വിരാട് കോഹ്‌ലിയെ കൂട്ടുപിടിച്ച് ഇന്ത്യ അനായാസം വിജയത്തിലേക്ക് എത്തുമെന്ന് തോന്നിച്ച ഘട്ടത്തിലാണ് ഇന്ത്യക്ക് തുടർച്ചയായി 4 വിക്കറ്റുകൾ നഷ്ടമായത്. തുടർന്ന് ജഡേജയെ കൂട്ടുപിടിച്ച് വിരാട് കോഹ്‌ലി ഇന്ത്യൻ സ്കോർ ഉയർത്തിയെങ്കിലും ഇന്ത്യൻ ക്യാപ്റ്റനും പുറത്തായതോടെ ഇന്ത്യ തോൽവിയെ നോക്കി കാണുകയായിരുന്നു. തുടർന്നാണ് ജഡേജയും ശർദൂൽ താക്കൂറും ഇന്ത്യക്ക് ജയം നേടിക്കൊടുത്തത്. ജഡേജ 31 പന്തിൽ 39 റൺസും ശർദൂൽ താക്കൂർ 6 പന്തിൽ 17 റൺസുമെടുത്താണ് ഇന്ത്യയുടെ ജയം ഉറപ്പിച്ചത്.

ഇന്ത്യക്ക് വേണ്ടി ക്യാപ്റ്റൻ വിരാട് കോഹ്‌ലി 85 റൺസും കെ.എൽ രാഹുൽ 77 റൺസും രോഹിത് ശർമ്മ 63 റൺസുമെടുത്ത് പുറത്തായി. നേരത്തെ ആദ്യ ഇന്നിങ്സിൽ പൊള്ളാർഡിന്റെയും നിക്കോളാസ് പൂരന്റെയും മികവിൽ വെസ്റ്റിൻഡീസ് 5 വിക്കറ്റ് നഷ്ടത്തിൽ 315 റൺസ് എടുത്തിരുന്നു.

Previous articleവാറ്റ്ഫോർഡിൽ നാണംകെട്ട് മാഞ്ചസ്റ്റർ യുണൈറ്റഡ്
Next articleഒഡീഷയെ തറപറ്റിച്ച് എഫ് സി ഗോവ ഒന്നാമത്