2023 ഏകദിന ലോകകപ്പിനുള്ള യോഗ്യതയ്ക്കായുള്ള പോരാട്ടങ്ങള്‍ക്ക് വിജയത്തോടെ തുടക്ക കുറിച്ച് വെസ്റ്റിന്‍ഡീസ്. ഇന്നലെ നടന്ന മത്സരത്തിൽ യുഎസ്എയ്ക്കെതിരെ 39 റൺസ് വിജയം ആണ് വെസ്റ്റിന്‍ഡീസ് നേടിയത്. ആദ്യ ബാറ്റ് ചെയ്ത വെസ്റ്റിന്‍ഡീസ് 49.3 ഓവറിൽ 297 റൺസിന് ഓള്‍ഔട്ട് ആയി.
66 റൺസ് നേടിയ ജോൺസൺ ചാള്‍സിനൊപ്പം ഷായി ഹോപ്(54), റോസ്ടൺ ചേസ്(55), ജേസൺ ഹോള്‍ഡര്‍(56), നിക്കോളസ് പൂരന്‍(43) എന്നിവരാണ് വെസ്റ്റിന്‍ഡീസിനായി മികവ് പുലര്‍ത്തിയത്. യുഎസ്എയ്ക്ക് വേണ്ടി നേത്രാവൽക്കര്‍, കൈൽ ഫിലിപ്പ്, സ്റ്റീവന്‍ ടെയിലര്‍ എന്നിവര്‍ മൂന്ന് വീതം വിക്കറ്റ് നേടി.
101 റൺസ് നേടി പുറത്താകാതെ നിന്ന ഗജാനന്ദ് സിംഗ് യുഎസ്എയുടെ പ്രതീക്ഷകള്‍ കാത്ത് സൂക്ഷിച്ചുവെങ്കിലും ടീമിന് 7 വിക്കറ്റ് നഷ്ടത്തിൽ 258 റൺസ് മാത്രമേ നേടാനായുള്ളു. കൈൽ മയേഴ്സും അൽസാരി ജോസഫും വെസ്റ്റിന്‍ഡീസിനായി രണ്ട് വീതം വിക്കറ്റ് നേടി.
