ഇന്ത്യൻ ക്രിക്കറ്റിലെ ഇതിഹാസ താരങ്ങളിൽ ഒരാളും മികച്ച ഇടംകൈയ്യൻ സ്പിന്നറുമായിരുന്ന ദിലീപ് ദോഷി (77) അന്തരിച്ചു. 2025 ജൂൺ 23 തിങ്കളാഴ്ച ലണ്ടനിലായിരുന്നു അന്ത്യം. അടുത്ത കുടുംബ സുഹൃത്തുക്കളാണ് ഈ വിവരം സ്ഥിരീകരിച്ചത്. ഇന്ത്യൻ ക്രിക്കറ്റ് ചരിത്രത്തിലെ ഒരു വലിയ അധ്യായത്തിനാണ് ഇതോടെ തിരശ്ശീല വീണത്.
32-ാം വയസ്സിൽ അന്താരാഷ്ട്ര ക്രിക്കറ്റിൽ അരങ്ങേറ്റം കുറിച്ച ദോഷി, 1979 മുതൽ 1983 വരെ ഇന്ത്യക്ക് വേണ്ടി 33 ടെസ്റ്റ് മത്സരങ്ങളിലും 15 ഏകദിനങ്ങളിലും കളിച്ചിട്ടുണ്ട്. ടെസ്റ്റിൽ ആറ് അഞ്ച് വിക്കറ്റ് നേട്ടങ്ങൾ ഉൾപ്പെടെ 114 വിക്കറ്റുകൾ സ്വന്തമാക്കി. ഏകദിനത്തിൽ 22 വിക്കറ്റുകളും നേടി.
ഇന്ത്യൻ ടീമിൽ എത്തുന്നതിന് മുൻപ് തന്നെ ആഭ്യന്തര ക്രിക്കറ്റിൽ ദിലീപ് ദോഷി തന്റെ സ്ഥാനം ഉറപ്പിച്ചിരുന്നു. 1968-69 സീസണിൽ ഫസ്റ്റ്-ക്ലാസ് ക്രിക്കറ്റിൽ അരങ്ങേറ്റം കുറിച്ച അദ്ദേഹം 238 ഫസ്റ്റ്-ക്ലാസ് മത്സരങ്ങളിൽ നിന്ന് 898 വിക്കറ്റുകൾ നേടി. ബംഗാളിനെയും സൗരാഷ്ട്രയെയും അദ്ദേഹം മികച്ച രീതിയിൽ പ്രതിനിധീകരിച്ചു.
