ചില സമയത്ത് ടി20യിൽ ആങ്കര്‍ റോള്‍ കളിക്കുന്നതിനെക്കുറിച്ചോര്‍ത്ത് തനിക്ക് ലജ്ജ തോന്നാറുണ്ടെന്ന് പറഞ്ഞ് പാക്കിസ്ഥാന്‍ താരം മൊഹമ്മദ് റിസ്വാന്‍. ബംഗ്ലാദേശ് പ്രീമിയര്‍ ലീഗിൽ കളിക്കുന്നതിനിടെയാണ് താരം റിപ്പോര്‍ട്ടര്‍മാരോട് പ്രതികരിച്ചത്. തന്നോട് കോമില വിക്ടോറിയന്‍സ് ആങ്കര്‍ റോളിൽ കളിക്കുവാനാണ് ആവശ്യപ്പെട്ടിരിക്കുന്നതെന്നും പാക്കിസ്ഥന് വേണ്ടി താന്‍ കളിക്കുന്ന ശൈലിയിൽ തന്നെ കളിക്കണമെന്നാണ് തന്നെ എടുക്കുന്ന ഫ്രാഞ്ചൈസികളുടെ ആവശ്യമെന്നും റിസ്വാന്‍ പറഞ്ഞു.
ടി20യിൽ ആങ്കര്‍ റോള്‍ വളരെ പ്രയാസമുള്ള റോളാണെന്നും ടി20യിൽ ഏവര്‍ക്കും സിക്സുകള്‍ നേടുവാനാണ് താല്പര്യമെങ്കിലും തനിക്ക് ടീം വിജയിക്കണമെന്നതാണ് പ്രധാനമെന്നും റിസ്വാന്‍ കൂട്ടിചേര്‍ത്തു.
താന്‍ സാഹചര്യങ്ങളും എതിരാളികളും എല്ലാം നോക്കിയാണ് ഇന്നിംഗ്സ് പടുത്തുയര്‍ത്തുന്നതെന്നും ടീമിന്റെ ആവശ്യം അനുസരിച്ച് കളിക്കാനാണ് താന്‍ ശ്രമിക്കുന്നതെന്നും റിസ്വാന്‍ വ്യക്തമാക്കി.
