സെലസ്റ്റിയൽ ട്രോഫിയുടെ സെമി ഫൈനലില്‍ പ്രവേശിച്ച് മാസ്റ്റേഴ്സ് സിസി തിരുവനന്തപുരം. ഗ്രൂപ്പ് ബിയിൽ ഇന്ന് കിഡ്സ് സിസിയ്ക്കെതിരെ 8 വിക്കറ്റ് വിജയം ആണ് മാസ്റ്റേഴ്സ് നേടിയത്. ഗ്രൂപ്പിലെ മൂന്ന് മത്സരങ്ങളിലും വിജയം കുറിച്ചാണ് മാസ്റ്റേഴ്സിന്റെ സെമി പ്രവേശനം.
ആദ്യം ബാറ്റ് ചെയ്ത കിഡ്സിന് 27 ഓവറിൽ നിന്ന് 118/9 എന്ന സ്കോറാണ് നേടാനായത്. അലന്‍ അലക്സ്(25), നന്ദകുമാര്‍(23), താഹിര്‍(23*) എന്നിവരുടെ ബാറ്റിംഗാണ് ടീമിനെ 118 റൺസിലേക്ക് എത്തിച്ചത്. മാസ്റ്റേഴ്സിനായി അതുൽ രവീന്ദ്രന്‍ മൂന്നും രാഹുല്‍ ചന്ദ്രന്‍, അനന്തകൃഷ്ണന്‍ എന്നിവര്‍ രണ്ട് വീതം വിക്കറ്റും നേടി.
വിഷ്ണു രാജ് 50 റൺസ് നേടി പുറത്താകാതെ നിന്നപ്പോള്‍ 38 പന്തിൽ 49 റൺസ് നേടിയ ഭരത് സൂര്യ തന്റെ പ്രകടനത്തിന് മാന്‍ ഓഫ് ദി മാച്ച് പുരസ്കാരം സ്വന്തമാക്കി. ഒരേ ഓവറിൽ അഭിഷേക് നായരെയും കൃഷ്ണ പ്രസാദിനെയും പുറത്താക്കി താഹിര്‍ മാസ്റ്റേഴ്സിനെ 33/2 എന്ന നിലയിലാക്കിയെങ്കിലും പിന്നീട് കിഡ്സ് ബൗളര്‍മാര്‍ക്ക് വിക്കറ്റ് നേടാന്‍ സാധിക്കാതെ വന്നപ്പോള്‍ 18.1 ഓവറിൽ മാസ്റ്റേഴ്സ് വിജയം കുറിച്ചു.
