സെലസ്റ്റിയൽ ട്രോഫിയിൽ ഇന്ന് നടന്ന രണ്ടാം മത്സരത്തിൽ സ്വാന്റൺസ് സിസിയ്ക്കെതിരെ മികച്ച വിജയം നേടി മാസ്റ്റേഴ്സ് സിസി. 66 റൺസിനാണ് മാസ്റ്റേഴ്സിന്റെ വിജയം. ആദ്യം ബാറ്റ് ചെയ്ത മാസ്റ്റേഴ്സ് 29.5 ഓവറിൽ 189 റൺസിന് ഓള്‍ഔട്ട് ആയപ്പോള്‍ കൃഷ്ണ പ്രസാദ് 54 റൺസുമായി ടോപ് സ്കോറര്‍ ആയി. വിഷ്ണു രാജ്(39), ഭരത് സൂര്യ(37) എന്നിവരാണ് മറ്റു പ്രധാന സ്കോറര്‍മാര്‍.
ആദ്യ ഓവറിൽ തന്നെ ഓപ്പണര്‍ അഭിഷേക് നായരെ നഷ്ടമായ ശേഷം വിഷ്ണു രാജും കൃഷ്ണപ്രസാദും ചേര്‍ന്ന് 75 റൺസാണ് രണ്ടാം വിക്കറ്റിൽ നേടിയത്. സ്വാന്റൺസിന് വേണ്ടി ഹരിപ്രസാദും വിഷ്ണു പി കുമാറും മൂന്ന് വീതം വിക്കറ്റ് നേടി ബൗളിംഗിൽ തിളങ്ങി.
മറുപടി ബാറ്റിംഗിനിറങ്ങിയ സ്വാന്റൺസിന് 28 ഓവറിൽ 8 വിക്കറ്റ് നഷ്ടത്തിൽ 123 റൺസ് മാത്രമേ നേടാനായുള്ളു. 26 റൺസ് നേടിയ ഘനശ്യാം ആണ് ടീമിന്റെ ടോപ് സ്കോറര്‍. അപ്പു പ്രകാശ് 25 റൺസും നേടി.
മാസ്റ്റേഴ്സിന് വേണ്ടി അനന്തകൃഷ്ണന്‍ 3 വിക്കറ്റ് നേടിയപ്പോള്‍ അതുൽ രവീന്ദ്രന്‍, അഭിഷേക് മോഹന്‍ എന്നിവര്‍ രണ്ട് വീതം വിക്കറ്റ് നേടി.
മാസ്റ്റേഴ്സിന്റെ കൃഷ്ണ പ്രസാദ് ആണ് കളിയിലെ താരം.
