ഷൈന്‍സിനെതിരെ 22 റണ്‍സ് വിജയം നേടി ബോയ്സ് സിസി

- Advertisement -

സെലസ്റ്റിയല്‍ ട്രോഫിയില്‍ തങ്ങളുടെ ജൈത്രയാത്ര തുടര്‍ന്ന് ബോയ്സ് സിസി. ഇന്ന് നടന്ന മത്സരത്തില്‍ ഷൈന്‍സ് സിസിയ്ക്കെതിരെയാണ് ബോയ്സ് 22 റണ്‍സ് വിജയം സ്വന്തമാക്കിയത്. ടോസ് നേടി ആദ്യം ബാറ്റ് ചെയ്ത ബോയ്സ് 30 ഓവറില്‍ നിന്ന് 8 വിക്കറ്റ് നഷ്ടത്തില്‍ 190 റണ്‍സ് നേടുകയായിരുന്നു. ഗോകുല്‍ വിജു(43), അബ്ദുള്‍ നസീര്‍(45) എന്നിവര്‍ക്കൊപ്പം കണ്ണന്‍(31), ഹരി കൃഷ്ണന്‍(35) എന്നിവരുടെ പ്രകടനം കൂടിയായപ്പോള്‍ ബോയ്സ് 190 റണ്‍സ് നേടുകയായിരുന്നു. ഷൈന്‍സിന് വേണ്ടി ശരത് ചന്ദ്ര പ്രസാദ് മൂന്നും ബാലഭാസ്കര്‍ രണ്ടും വിക്കറ്റ് നേടി.

ചേസിംഗില്‍ ഷൈന്‍സിന് വേണ്ടി അക്ഷയ് ശ്രീധര്‍(41), ശരത് ചന്ദ്ര പ്രസാദ്(30) എന്നിവര്‍ പൊരുതി നോക്കിയെങ്കിലും മറ്റു ബാറ്റ്സ്മാന്മാര്‍ക്ക് ലഭിച്ച തുടക്കം വലിയ സ്കോറിലേക്ക് മാറ്റുവാന്‍ കഴിയാതെ പോയതും ടീമിന് തിരിച്ചടിയായി. ഷൈന്‍(20), കാര്‍ത്തിക് നായര്‍(18), ബിജു നായര്‍(17) എന്നിവരാണ് തുടക്കം വലിയ സ്കോറിലേക്ക് മാറ്റുവാനാകാതെ പുറത്തായ മറ്റു താരങ്ങള്‍.

കളിയിലെ താരമായി തിരഞ്ഞെടുക്കപ്പെട്ട ബോയ്സ് താരം നിരഞ്ജന്‍ 4 വിക്കറ്റും യദു കൃഷ്ണന്‍ 3 വിക്കറ്റും നേടിയപ്പോള്‍ രവി ശങ്കര്‍ രണ്ട് വിക്കറ്റിന് ഉടമയായി. 30 ഓവറില്‍ 9 വിക്കറ്റുകളുടെ നഷ്ടത്തില്‍ ഷൈന്‍സ് ഇന്നിംഗ്സ് 168 റണ്‍സില്‍ അവസാനിച്ചു.

Advertisement