ഏഷ്യ കപ്പില്‍ പാക്കിസ്ഥാനെ 8 വിക്കറ്റിനു പരാജയപ്പെടുത്തിയ ഇന്ത്യയുടെ ഈ വിജയം ഏകദിനത്തില്‍ ഇത്രയധികം പന്തുകള്‍ അവശേഷിക്കെ പാക്കിസ്ഥാനെതിരെയുള്ള ഏറ്റവും വലിയ വിജയമാണ്. 126 പന്തുകള്‍ അവശേഷിക്കെയാണ് ഇന്ത്യ മികച്ച വിജയം സ്വന്തമാക്കിയത്. മത്സരത്തില്‍ 162 റണ്‍സിനു പാക്കിസ്ഥാനെ എറിഞ്ഞിട്ട ശേഷം ഇന്ത്യ 29 ഓവറില്‍ 2 വിക്കറ്റുകളുടെ നഷ്ടത്തില്‍ വിജയം കുറിയ്ക്കുകയായിരുന്നു. 21 ഓവര്‍ ശേഷിക്കെയാണ് ഇന്ത്യയുടെ ഈ തകര്‍പ്പന്‍ ജയം.
നായകന്‍ രോഹിത് ശര്‍മ്മ 52 റണ്‍സ് നേടി പുറത്തായപ്പോള്‍ ശിഖര്‍ ധവാന്‍ 46 റണ്‍സില്‍ പുറത്തായി. അമ്പാട്ടി റായിഡുവും ദിനേശ് കാര്‍ത്തിക്കും 31 റണ്‍സ് വീതം നേടി മൂന്നാം വിക്കറ്റില്‍ 60 റണ്‍സ് കൂട്ടുകെട്ടുമായി ടീമിനെ വിജയത്തിലേക്ക് നയിച്ചു.
