ലോര്ഡ്സ് ടെസ്റ്റിന്റെ ആദ്യ ദിവസം അവസാനിക്കുമ്പോള് ഓസ്ട്രേലിയ 339 റൺസ്. മൂന്ന് താരങ്ങള് അര്ദ്ധ ശതകങ്ങള് നേടിയപ്പോള് ഓസ്ട്രേലിയ ഒന്നാം ദിവസം അഞ്ച് വിക്കറ്റ് നഷ്ടപ്പെട്ടുവെങ്കിലും സ്മിത്തിന്റെ ആധികാരിക പ്രകടനം ഓസ്ട്രേലിയയ്ക്ക് തന്നെയാണ് മത്സരത്തിൽ മേൽക്കൈ നൽകിയത്. ആദ്യ ദിവസത്തെ കളിയുടെ അവസാനത്തോടെ രണ്ട് വിക്കറ്റ് നേടി ജോ റൂട്ടാണ് ഒരു പരിധി വരെ ഇംഗ്ലണ്ടിന്റെ തിരിച്ചുവരവിന് അവസരം ഒരുക്കിയത്. ഡേവിഡ് വാര്ണര്(66), സ്റ്റീവ് സ്മിത്ത്(85*), ട്രാവിസ് ഹെഡ്(77) എന്നിവരാണ് ഓസ്ട്രേലിയയ്ക്കായി അര്ദ്ധ ശതകം നേടിയത്.
ജോ റൂട്ട് ഒരേ ഓവറിൽ ട്രാവിസ് ഹെഡിനെയും കാമറൺ ഗ്രീനിനെയും പുറത്താക്കിയത് ഓസ്ട്രേലിയയ്ക്ക് തിരിച്ചടിയായി. മാര്നസ് ലാബൂഷാനെയ്ക്ക്(47) അര്ദ്ധ ശതകം നഷ്ടമായി. സ്മിത്തിനൊപ്പം 11 റൺസുമായി അലക്സ് കാറെയാണ് ക്രീസിലുള്ളത്.