പരിക്ക് കാരണം ദി ഹണ്ട്രെഡിൽ നിന്ന് പിന്മാറിയ റഷീദ് ഖാന്‍ അഫ്ഗാനിസ്ഥാന്റെ പാക്കിസ്ഥാനെതിരെയുള്ള ഏകദിന പരമ്പരയിൽ കളിക്കുമെന്ന് അറിയിച്ച് അഫ്ഗാന്‍ ക്രിക്കറ്റ് ബോര്‍ഡ്. ഓഗസ്റ്റ് 22ന് ശ്രീലങ്കയിലാണ് മൂന്ന് മത്സരങ്ങളുടെ ഏകദിന പരമ്പര നടക്കുന്നത്.
മേജര്‍ ക്രിക്കറ്റ് ലീഗിൽ കളിച്ച ശേഷം ദി ഹണ്ട്രെഡിൽ കളിക്കാന്‍ എത്തേണ്ടിയിരുന്ന റഷീദ് ഖാന്‍ പക്ഷേ ടൂര്‍ണ്ണമെന്റിൽ നിന്ന് പിന്മാറുകയായിരുന്നു. പുറംവേദനയായിരുന്നു താരത്തിന്റെ ഈ പിന്മാറ്റത്തിന് കാരണം. ഏഷ്യ കപ്പിന്റെ തയ്യാറെടുപ്പുകള്‍ക്ക് പ്രധാനമാണ് അഫ്ഗാനിസ്ഥാന്റെ പാക്കിസ്ഥാന്‍ ഏകദിന പരമ്പര.
കാബൂളിലും ഹമ്പന്‍ടോട്ടയിലുമായി അഫ്ഗാനിസ്ഥാന്‍ വരും ദിവസങ്ങളിൽ ക്യാമ്പുകള്‍ സംഘടിപ്പിക്കുന്നുണ്ടെന്നാണ് ലഭിയ്ക്കുന്ന വിവരം.
