Author: Roshan

ബർമിംഗ്ഹാം സ്‌ട്രൈക്കർ ചെ ആഡംസിനെ സ്വന്തമാക്കി പ്രീമിയർ ലീഗ് ക്ലബ് സൗത്താംപ്ടൺ. ഏകദേശം പതിനഞ്ചു മില്യൺ പൗണ്ട് തുകക്കായാണ് അഞ്ചു വർഷത്തെ കരാറിൽ സൈന്റ്സ് ഈ യുവതാരത്തെ സ്വന്തമാക്കിയിരിക്കുന്നത്.ബർമിംഗ്ഹാമിനു വേണ്ടി 123 മത്സരങ്ങളിൽ കുപ്പായമണിഞ്ഞ ആഡംസ് 38 ഗോളുകൾ സ്വന്തം പേരിലാക്കിയിരുന്നു. കഴിഞ്ഞ സീസണിൽ 22 ഗോളുകൾ നേടിയ താരം മികച്ച ഫോമിലാണ്.

ഇക്കഴിഞ്ഞ ജനുവരി ട്രാൻസ്ഫർ വിൻഡോയിൽ തന്നെ ചെ ആഡംസിനെ ടീമിൽ എത്തിക്കാൻ സൗത്താംപ്ടൺ ശ്രമിച്ചിരുന്നു. എന്നാൽ ആ ശ്രമത്തിൽ പരാജയപ്പെട്ട സൈന്റ്സ് ഈ വിൻഡോയിൽ ഇംഗ്ലീഷ് താരത്തെ ടീമിൽ എത്തിക്കുകയായിരുന്നു.

ലെസ്റ്റർ സ്വദേശിയായ ചെ ആഡംസ് നോൺ ലീഗ് ക്ലബ് ഓഡബിയിലൂടെ ആണ് തന്റെ കരിയർ ആരംഭിച്ചത്. തുടർന്ന് 2014 ഷെഫീൽഡ് യുണൈറ്റഡിൽ എത്തിയ ആഡംസ് 2016ൽ ആണ് ബർമിംഗ്ഹാമിൽ എത്തിയത്.

യുവതാരം മാർക്കസ് റാഷ്‌ഫോർഡിനു മാഞ്ചസ്റ്റർ യൂണൈറ്റഡിൽ പുതിയ കരാർ. പുതിയ കരാർ പ്രകാരം 21കാരനായ റാഷ്‌ഫോർഡ് 2023 വരെ ഓൾഡ് ട്രാഫോഡിൽ തുടരും. മാഞ്ചസ്റ്റർ യുണൈറ്റഡിന്റെ ഔദ്യോഗിക സോഷ്യൽ മീഡിയ അകൗണ്ടുകൾ വഴിയാണ് റാഷ്‌ഫോർഡ് കരാർ പുതുക്കിയ വിവരം പുറത്തുവിട്ടത്.

ക്ലബിന്റെ അക്കാദമിയിലൂടെ വളർന്നു വന്ന മാർക്കസ് റാഷ്‌ഫോർഡ് തന്റെ 18ആം വയസിൽ 2016ൽ യൂറോപ്പ ലീഗിലൂടെ യുണൈറ്റഡിന് വേണ്ടി അരങ്ങേറ്റം കുറിക്കുന്നത്. തുടർന്നിങ്ങോട്ട് യുണൈറ്റഡിന്റെ പ്രധാന താരമായി മാറിയ റാഷ്‌ഫോർഡ് 172 തവണ കളത്തിൽ ഇറങ്ങി. 45 ഗോളുകളൂം സ്വന്തം പേരിലാക്കിയ താരം ഇക്കഴിഞ്ഞ ജനുവരി മാസത്തിലെ പ്രീമിയർ ലീഗിലെ മികച്ച താരവുമായിരുന്നു. ഇംഗ്ലണ്ടിന് വേണ്ടി 32 തവണയും റാഷ്‌ഫോർഡ് കളത്തിൽ ഇറങ്ങിയിട്ടുണ്ട്.

“ഏഴു വയസ് മുതൽ ഞാൻ ഈ ക്ലബിന്റെ ഭാഗമാണ്, ഈ ക്ലബാണ് ജീവിതത്തിൽ എനിക്കെല്ലാം. യുണൈറ്റഡ് ആണ് എന്നെ കളിക്കാരൻ ആക്കിയത്. ഈ കുപ്പായം അണിയാൻ കഴിയുന്നത് ഭാഗ്യമായി കരുതുന്നു.” – റാഷ്‌ഫോർഡ് പറഞ്ഞു.

2016ൽ മാഞ്ചസ്റ്റർ യുണൈറ്റഡിൽ നിന്നും പുറത്താക്കപ്പെട്ട ലൂയിസ് വാൻഹാൽ ആണ് താൻ ഇതുവരെ കളിച്ചത്തിൽ വെച്ച് ഏറ്റവും മികച്ച കോച്ചെന്നു മുൻ യുണൈറ്റഡ് താരവും നിലവിൽ ഡിസി യുണൈറ്റഡ് താരവുമായ വെയ്ൻ റൂണി. സർ അലക്സ് ഫെർഗൂസന്റെ കൂടെ ഒൻപത് വർഷ കാലയളവിൽ 5 പ്രീമിയർ ലീഗ് കിരീടങ്ങളടക്കം നേടിയിട്ടും മികച്ച കോച്ചായി റൂണി പരിഗണിക്കുന്നത് ലൂയിസ് വാൻഹാലിനെയാണ്.

2016ൽ എഫ്എ കപ്പ് വിജയത്തിന് ശേഷമാണ് വാൻ ഹാലിനെ മാഞ്ചസ്റ്റർ യുണൈറ്റഡ് പുറത്താക്കിയത്. രണ്ടു വര്ഷം മാഞ്ചസ്റ്റർ യുണൈറ്റഡിൽ പരിശീലിപ്പിച്ച വാൻഹാലിനു പക്ഷെ അത്ര നല്ല ദിനങ്ങൾ ആയിരുന്നില്ല ഓൾഡ് ട്രാഫോഡിൽ ഉണ്ടായിരുന്നത്. ഇങ്ങയെയൊക്കെയാണെങ്കിലും റൂണി മികച്ച കോച്ചായി കാണുന്നത് വാൻഹാലിനെയാണ്. “ഞാൻ ഇതുവരെ കളിച്ചിട്ടുള്ളതിൽ വെച്ച് ഏറ്റവും മികച്ച കോച്ച് ലൂയിസ് വാൻഹാൽ ആണ്, അദ്ധേഹത്തിന്റെ ടാക്റ്റിക്സ് വളരെ മികച്ചതാണ്. ഓരോ കാര്യത്തിലും അദ്ദേഹം പുലർത്തുന്ന ശ്രദ്ധ വളരെ കൂടുതൽ ആണ്. ഇങ്ങനെ ഒന്ന് അതിനു മുൻപ് ഞാൻ കണ്ടിരുന്നില്ല” റൂണി പറഞ്ഞു.

2004ൽ എവർട്ടണിൽ നിന്നും ഫെർഗൂസൻ ആണ് റൂണിയെ യുണൈറ്റഡിൽ എത്തിച്ചത്. തുടർന്ന് അദ്ദേഹത്തിന്റെ കൂടെ 5 പ്രീമിയർ ലീഗ് കിരീടങ്ങളും ഒരു ചാമ്പ്യൻസ് ലീഗ് ട്രോഫിയുമടക്കം നിരവധി കിരീടങ്ങൾ റൂണി സ്വന്തമാക്കിയിരുന്നു. 2016ൽ ആണ് റൂണി മാഞ്ചസ്റ്റർ യുണൈറ്റഡ് വിട്ടു എവർട്ടണിലേക്ക് ചേക്കേറിയത്.

പ്രീമിയർ ലീഗിൽ ചൊവ്വാഴ്ച രാത്രിയിലെ പോരാട്ടങ്ങളിൽ എവർട്ടൻ, ന്യൂകാസിൽ യുണൈറ്റഡ്, ഹഡേഴ്‌സ്ഫീൽഡ് എന്നീ ക്ലബുകൾക്ക് വിജയം. എതിരില്ലാത്ത മൂന്നു ഗോളുകൾക്ക് ആണ് എവർട്ടൻ കാർഡിഫ് സിറ്റിയെ തോൽപ്പിച്ചത്. എവർട്ടന് വേണ്ടി സിഗുർഡ്സൻ രണ്ടു ഗോളുകൾ നേടിയപ്പോൾ കാൽവേർട്ട് ലെവിന്റെ വകയായിരുന്നു മൂന്നാം ഗോൾ. വിജയത്തോടെ എവർട്ടൻ ഒൻപതാം സ്ഥാനത്തെത്തി.

എതിരില്ലാത്ത രണ്ടു ഗോളുകൾക്കായിരുന്നു ബേൺലിക്കെതിരെ ന്യൂകാസിൽ യുണൈറ്റഡിന്റെ വിജയം. സ്ഷാറും ലോങ്സ്റ്റഫും ആണ് ന്യൂകാസിലിന് വേണ്ടി വല കുലുക്കിയത്. വിജയത്തോടെ ന്യൂകാസിൽ 31 പോയിന്റോടെ ടേബിളിൽ 13ആം സ്ഥാനത്തെത്തി.

മറ്റൊരു മത്സരത്തിൽ റെലഗേഷൻ ഭീഷണി നേരിടുന്ന ഹഡേഴ്‌സ്ഫീൽഡ് കരുത്തരായ വോൾവ്‌സിനെ അട്ടിമറിച്ചു. മത്സരത്തിന്റെ അവസാനം ഇഞ്ചുറി ടൈമിൽ മുനീയെ നേടിയ ഗോളിൽ ആണ് ടീം വിജയം കണ്ടത്. വിജയിച്ചു എങ്കിലും ഹഡേഴ്‌സ്ഫീൽഡ് ടേബിളിൽ അവസാന സ്ഥാനത്ത് തുടരുകയാണ്.

കഴിഞ്ഞ ഡിസംബറിൽ ആയിരുന്നു ജോസേ മൗറീഞ്ഞോക്ക് പകരമായി ഒലെ ഗുണ്ണാർ സോൾഷ്യാർ മാഞ്ചസ്റ്റർ യുണൈറ്റഡിന്റെ താത്കാലിക കോച്ചായി ചുമതലയേറ്റടുത്തത്. തുടർന്നിങ്ങോട്ട് പ്രീമിയർ ലീഗിലെ തന്നെ ഏറ്റവും മികച്ച ടീമായി വൻ പ്രകടനമാണ് സോൾഷ്യാറിന് കീഴിൽ യുണൈറ്റഡ് പുറത്തെടുക്കുന്നത്. സോൾഷ്യാറിന്റെ കീഴിൽ ടീം മികച്ച പ്രകടനം പുറത്തെടുക്കുന്നിടത്തോളം പുതിയ മാനേജരെ തിരഞ്ഞെടുക്കുക എന്നത് യുണൈറ്റഡ് മാനേജ്‌മെന്റിന് വലിയ തലവേദയായിരിക്കും ഇന്ന് മുൻ യുണൈറ്റഡ് ക്യാപ്റ്റനും സോൾഷ്യാറുടെ സഹതാരവുമായിരുന്ന ഗാരി നെവിൽ.

സോൾഷ്യാറിന്റെ കീഴിൽ ഇതുവരെ തോൽവി അറിയാത്ത യുണൈറ്റഡ് 9 മത്സരങ്ങളിൽ നിന്നും 8 എണ്ണവും വിജയിച്ചിട്ടുണ്ട്, അത് കൊണ്ട് തന്നെ സോൾഷ്യാർ സ്ഥിരം മാനേജർ ആവാൻ അവകാശമുന്നയിച്ചാൽ മാനേജ്മെന്റിന് അദ്ദേഹത്തെ അവഗണിക്കാൻ കഴിയില്ല എന്നാണ് ഗാരി പറയുന്നത്.

“വരുന്ന 3-4 മാസങ്ങളിൽ എന്തും സംഭവിക്കാം, സോൾഷ്യാർ ഇതുപോലെ മികച്ച പ്രകടനം കാഴ്ചവെച്ചാൽ അദ്ദേഹത്തെ അവഗണിക്കാൻ യുണൈറ്റഡിന് കഴിയില്ല. കളിക്കാരും, ഫാൻസും എല്ലാം സോൾഷ്യാറിന്റെ കൂടെ ഉണ്ടെങ്കിൽ പിന്നെ മറ്റൊരു മാനേജരെ നോക്കുക എന്നത് ബോർഡിന് ബുദ്ധിമുട്ടാവും” നെവിൽ പറഞ്ഞു.

നാളെ ലെസ്റ്റർ സിറ്റിക്കെതിരെയാണ് മാഞ്ചസ്റ്റർ യുണൈറ്റഡിന്റെ അടുത്ത മത്സരം. സോൾഷ്യാർ മാനേജരായി ചുമതല ഏറ്റെടുക്കുമ്പോൾ നാലാം സ്ഥാനത്തിൽ നിന്നും 11 പോയിന്റ് പിന്നിൽ ആയിരുന്നു യുണൈറ്റഡ്, എന്നാൽ ഇപ്പോൾ 2 പോയിന്റ് പിന്നിൽ മാത്രമാണ് ടീം.