വലിയ മാര്‍ജിനില്‍ പട്ന പൈറേറ്റ്സിന്റെ ജയം. തമിഴ് തലൈവാസിനെതിരെ 18 പോയിന്റ് വ്യത്യാസത്തിലാണ് നിലവിലെ ചാമ്പ്യന്മാരായ പട്ന പൈറേറ്റ്സിന്റെ വിജയം. 45-27 എന്ന സ്കോറിനാണ് പട്നയുടെ വിജയം. ഇടവേള സമയത്ത് 16-13നു നേരിയ ലീഡ് മാത്രമാണ് പട്ന സ്വന്തമാക്കിയതെങ്കിലും രണ്ടാം പകുതിയില്‍ തലൈവാസിനെ പട്ന കശക്കിയെറിയുകയായിരുന്നു.
13 പോയിന്റ് നേടിയ പര്‍ദീപ് നര്‍വാലിനൊപ്പം ദീപക് നര്‍വാലും(10) മഞ്ജീത്തും(8) തിളങ്ങിയപ്പോളാണ് പട്ന പൈറേറ്റ്സിന്റെ തകര്‍പ്പന്‍ ജയത്തിനു അരങ്ങൊരുങ്ങിയത്. 8 പോയിന്റ് നേടിയ അജയ് താക്കൂര്‍ ആണ് തലൈവാസിന്റെ ടോപ് സ്കോറര്‍. മഞ്ജീത്ത് ചില്ലര്‍ 5 പോയിന്റ് നേടി.
റെയിഡിംഗില്‍ 28-21നു പട്ന മുന്നില്‍ നില്‍ക്കുകയും പ്രതിരോധത്തില്‍ 10-4ന്റെ ലീഡും ടീം കരസ്ഥമാക്കിയിരുന്നു. മൂന്ന് തവണ പട്ന തലൈവാസിനെ ഓള്‍ഔട്ട് ആക്കിയപ്പോള്‍ ഒരു തവണ പട്നയ്ക്കും കാലിടറി.
