വിന്‍ഡീസ് ക്രിക്കറ്റ് ബോര്‍ഡിന്റെ കേന്ദ്ര കരാര്‍ വേണ്ടെന്ന് തീരുമാനിച്ച് എവിന്‍ ലൂയിസ്. 2018-19 സീസണിലേക്കുള്ള പരിമിത ഓവര്‍ കരാര്‍ ആണ് താരം നിരസിച്ചതെന്ന് ബോര്‍ഡ് തന്നെ അറിയിക്കുകയായിരുന്നു. ക്രിസ് ഗെയില്‍, ആന്‍ഡ്രേ റസ്സല്‍, കീറണ്‍ പൊള്ളാര്‍ഡ്, ഡ്വെയിന്‍ ബ്രാവോ, സുനില്‍ നരൈന്‍ എന്നീ താരങ്ങള്‍ ഇതിനു മുമ്പ് ടി20 ലീഗുകളില്‍ സജീവമായി കളിക്കുന്നതിനു വേണ്ടി ബോര്‍ഡുമായുള്ള കരാര്‍ വേണ്ടെന്ന് പലപ്പോഴായി തീരുമാനിച്ചിട്ടുള്ളവരാണ്.
ബോര്‍ഡ് ഇന്ന് പുരുഷ വനിത വിഭാഗത്തില്‍ കരാര്‍ നിലനിര്‍ത്തിയവരുടെ പട്ടിക പുറത്ത് വിട്ടപ്പോളാണ് ഈ വിവരം പുറത്ത് വന്നത്.
നാല് താരങ്ങള്‍ക്കാണ് എല്ലാ ഫോര്‍മാറ്റിലും കരാര്‍ ലഭിയ്ക്കുന്നത്. ജേസണ്‍ ഹോള്‍ഡര്‍, അല്‍സാരി ജോസഫ്, ഷായി ഹോപ്, കെമര്‍ റോച്ച് എന്നിവരാണിവര്‍. ടെസ്റ്റില്‍ ദേവേന്ദ്ര ബിഷൂ, ക്രെയിഗ് ബ്രാത്‍വൈറ്റ്, റോഷ്ടണ്‍ ചേസ്, മിഗ്വല്‍ കമ്മിന്‍സ്, ഷെയിന്‍ ഡോവ്റിച്ച്, ഷാനണ്‍ ഗബ്രിയേല്‍, ഷിമ്രണ്‍ ഹെറ്റ്മ്യര്‍, കീറണ്‍ പവല്‍ എന്നിവരും കാര്‍ലോസ് ബ്രാത്‍വൈറ്റ്, ആഷ്‍ലി നഴ്സ്, റോവ്മന്‍ പവല്‍ എന്നിവര്‍ വൈറ്റ് ബോള്‍ ക്രിക്കറ്റിലും കരാര്‍ ലഭിച്ചു. സുനില്‍ ആംബ്രിസ്, കീമോ പോള്‍, റേയ്മന്‍ റീഫര്‍ എന്നിവര്‍ക്ക് ഭാവി താരങ്ങളെന്ന നിലയില്‍ കരാര്‍ ലഭിച്ചു.
