വിജയ് ഹസാരെ ട്രോഫിയിൽ ആന്ധ്രാപ്രദേശിനെതിരായ ഡൽഹിയുടെ ആദ്യ മത്സരത്തിനായി വിരാട് കോഹ്ലിയും ഋഷഭ് പന്തും തിങ്കളാഴ്ച രാത്രി ബെംഗളൂരുവിലെത്തി. എന്നാൽ, ചിന്നസ്വാമി സ്റ്റേഡിയത്തിൽ നടക്കുന്ന മത്സരത്തിൽ കാണികൾക്ക് പ്രവേശനം അനുവദിക്കില്ലെന്ന വാർത്ത ആരാധകർക്ക് നിരാശയായിരിക്കുകയാണ്.
ഉത്സവ സീസണിലെ സുരക്ഷാ വെല്ലുവിളികളും കഴിഞ്ഞ ജൂണിലുണ്ടായ അപകടത്തിന്റെ പശ്ചാത്തലത്തിലും കാണികളെ പ്രവേശിപ്പിക്കാൻ പ്രാദേശിക അധികൃതർ അനുമതി നൽകിയിട്ടില്ല. സുരക്ഷാ കാരണങ്ങളാൽ മത്സരം കാണികളില്ലാതെ ബിസിസിഐയുടെ സെന്റർ ഓഫ് എക്സലൻസിലേക്ക് മാറ്റാനും സാധ്യതയുണ്ട്.
ഏകദേശം 3,000 കാണികളെ പ്രവേശിപ്പിക്കാൻ കെഎസ്സിഎ അനുമതി തേടിയെങ്കിലും, കോഹ്ലിയും പന്തും ഉൾപ്പെടെയുള്ള സൂപ്പർ താരങ്ങൾ കളിക്കാനിറങ്ങുമ്പോൾ വലിയ ജനക്കൂട്ടത്തെ നിയന്ത്രിക്കുക പ്രായോഗികമല്ലെന്ന് സംസ്ഥാന സർക്കാർ വിലയിരുത്തി. 15 വർഷത്തെ ഇടവേളയ്ക്ക് ശേഷമാണ് കോഹ്ലി ഒരു ആഭ്യന്തര ഏകദിന മത്സരത്തിനായി ഇറങ്ങുന്നത്.
സുരക്ഷാ മുൻകരുതലുകൾ കളിക്കാർക്ക് കൂടുതൽ ഏകാഗ്രതയോടെ കളിക്കാൻ സഹായിക്കുമെങ്കിലും പ്രിയതാരങ്ങളെ നേരിട്ട് കാണാനുള്ള അവസരം നഷ്ടമായതിന്റെ വിഷമത്തിലാണ് ആരാധകർ.
