റോം: സ്പെയിൻ ദേശീയ ടീം ക്യാപ്റ്റൻ അൽവാരോ മൊറാട്ട ഇറ്റാലിയൻ ക്ലബ് കോമോയിലേക്ക്. എസി മിലാനിൽ നിന്നാണ് ലോൺ വ്യവസ്ഥയിൽ മൊറാട്ട കോമോയിലെത്തുന്നത്. ലോൺ കരാർ അവസാനിക്കുന്നതോടെ താരത്തെ കോമോ സ്വന്തമാക്കുമെന്നും ഇരു ക്ലബുകളും അറിയിച്ചു.
യൂറോ 2024 കിരീടം നേടിയ സ്പാനിഷ് ടീമിൻ്റെ നായകനായിരുന്നു 32-കാരനായ മൊറാട്ട. കഴിഞ്ഞ സീസണിൽ എസി മിലാനിൽ അവസരങ്ങൾ കുറഞ്ഞതോടെ താരം തുർക്കിഷ് ക്ലബായ ഗലാറ്റസറേയിൽ ലോൺ അടിസ്ഥാനത്തിൽ കളിച്ചിരുന്നു.
മുൻ സ്പാനിഷ് സഹതാരവും കോമോയുടെ പരിശീലകനുമായ സെസ്ക് ഫാബ്രിഗസിൻ്റെ കീഴിലാണ് മൊറാട്ട കളിക്കുക. 21 വർഷത്തിന് ശേഷം സെരി എ-യിൽ തിരിച്ചെത്തിയ കോമോ കഴിഞ്ഞ സീസണിൽ പത്താം സ്ഥാനത്താണ് ഫിനിഷ് ചെയ്തത്. പുതിയ സീസണിന് മുന്നോടിയായി ടീം കൂടുതൽ ശക്തിപ്പെടുത്തുന്നതിൻ്റെ ഭാഗമായാണ് മൊറാട്ടയെ ടീമിലെത്തിച്ചത്.
പുതിയ ക്ലബ്ബിൽ ചേരുന്നതിൽ അതിയായ സന്തോഷമുണ്ടെന്നും ടീമിനായി തൻ്റെ നൂറുശതമാനം നൽകുമെന്നും മൊറാട്ട പറഞ്ഞു. മികച്ച കളിക്കാരനും ടീമിനെ നയിക്കാൻ കഴിവുള്ള താരവുമാണ് മൊറാട്ടയെന്ന് ഫാബ്രിഗസ് അഭിപ്രായപ്പെട്ടു. ഓഗസ്റ്റ് 24-ന് ലാസിയോക്കെതിരെയാണ് കോമോയുടെ പുതിയ സീസണിലെ ആദ്യ മത്സരം.
