ഫോമിൽ ഇക്കാത്ത ശുഭ്മാൻ ഗില്ലിനെയും ശ്രേയസ് അയ്യരെയും പിന്തുണച്ച് ഇന്ത്യൻ ബാറ്റിംഗ് കോച്ച് വിക്രം റാത്തോർ. ഇരുവരും ഫോമിലേക്ക് ഉടൻ തിരികെയെത്തും എന്ന് അദ്ദേഹം പറഞ്ഞു. സമീപകാലത്തായി ടെസ്റ്റിൽ ഗില്ലും അയ്യരും വളരെ മോശം ഫോമിലാണ്. മൂന്നാം സ്ഥാനത്തേക്ക് മാറിയ ഗില്ലിന് മികച്ച പ്രകടനം കാഴ്ചവെക്കാൻ ഇതുവരെ ആയിട്ടില്ല. കഴിഞ്ഞ വർഷത്തിൻ്റെ തുടക്കത്തിൽ ബോർഡർ-ഗവാസ്‌കർ ട്രോഫിയിലായിരുന്നു അദ്ദേഹത്തിൻ്റെ അവസാന വലിയ സ്കോർ, അതിനുശേഷം അദ്ദേഹം ഫിഫ്റ്റി സ്കോർ ചെയ്‌തിട്ടില്ല.
ശ്രേയസ് ടീമിലേക്ക് തിരികെ എത്തിയ ശേഷം അർധ സെഞ്ച്വറി നേടിയില്ല. എങ്കിലും റാത്തോർ ഇരുവരെയും പിന്തുണച്ചു. “അവരുടെ കഴിവിനെക്കുറിച്ച് ഒരു ചോദ്യവുമില്ല, ഇരുവരും വളരെ മികച്ച കളിക്കാരാണ്,” റാത്തൂർ പറഞ്ഞു.
“ആളുകൾ മോശം ഫോമുകളിലൂടെ കടന്നുപോകുന്നു, നിങ്ങൾ ആഗ്രഹിക്കുന്നത്ര റൺസ് സ്കോർ ചെയ്യാത്ത മോശം പാച്ചുകൾ ഉണ്ടാകും. ഞങ്ങൾ നോക്കുന്നത് അവർ എങ്ങനെ തയ്യാറെടുക്കുന്നു, അവരുടെ മാനസികാവസ്ഥ എങ്ങനെയെന്നതാണ്.” അദ്ദേഹം പറഞ്ഞു.
“അവർ നന്നായി തയ്യാറെടുക്കുന്നു, അവർ നെറ്റ്‌സിൽ കഠിനാധ്വാനം ചെയ്യുന്നു. ഇരുവരിൽ നിന്നും ഒരു വലിയ പ്രകടനം ഉണ്ടാകുമെന്ന് ഞാൻ വിശ്വസിക്കുന്നു.” അദ്ദേഹം പറഞ്ഞു.
