വംശീയാധിക്ഷേപങ്ങൾക്ക് എതിരെ ലാലിഗ ഒരു നിലപാടും എടുക്കുന്നില്ല എന്ന് റയൽ മാഡ്രിഡ് വിങ്ങർ വിനീഷ്യസ് ജൂനിയർ. വെള്ളിയാഴ്ച റയൽ വയ്യാഡോയൊഡിന് എതിരായ റയൽ മാഡ്രിഡിന്റെ മത്സരത്തിന് ഇടയിൽ വിനീഷ്യസിന് എതിരെ വംശീയാധിക്ഷേപം നടന്നിരുന്നു. ഇത് ലാലിഗ മുമ്പ് നടപടികൾ ഒന്നും എടുക്കാത്തത് കൊണ്ടാണ് എന്ന് വിനീഷ്യസ് പറയുന്നു.
കഴിഞ്ഞ സെപ്റ്റംബറിൽ അത്ലറ്റിക്കോ മാഡ്രിഡ് ആരാധകർ വിനീഷ്യസിന് എതിരെ വംശീയാധിക്ഷേപം നടത്തിയിരുന്നു. ആ അന്വേഷണം കുറ്റക്കാരെ കണ്ടെത്താൻ ആകുന്നില്ല എന്ന് പറഞ്ഞ് ലാലിഗ കഴിഞ്ഞ ആഴ്ച അവസാനിപ്പിച്ചിരുന്നു.
“വംശീയവാദികൾ മത്സരത്തിന് പോകുകയും ഇത് പോലെ മത്സരങ്ങൾ അടുത്ത് കാണുകയും ചെയ്യുന്നു, ലാ ലിഗ ഇതിനെതിരെ ഒന്നും ചെയ്യുന്നില്ല,” വിനീഷ്യസ് പറഞ്ഞു.
“ഞാൻ തലയുയർത്തിപ്പിടിച്ച് എന്റെയും മാഡ്രിഡിന്റെയും വിജയങ്ങൾ ആഘോഷിക്കും. ഈ ആക്രമങ്ങൾക്ക് ഒക്കെ അവസാനം തെറ്റ് എന്റെതാണ് എന്ന് ഇവർ പറയും” വിനീഷ്യസ് കൂട്ടിച്ചേർത്തു.
