ഇംഗ്ലീഷ് പ്രീമിയർ ലീഗിൽ വെസ്റ്റ് ഹാമിന് മികച്ച വിജയം. ഇന്ന് ക്രിസ്റ്റൽ പാലസിന്റെ ഹോമിൽ ചെന്ന് വിയേരയുടെ ടീമിനെ രണ്ടിനെതിരെ മൂന്ന് ഗോളുകൾക്ക് തോൽപ്പിക്കാൻ വെസ്റ്റ് ഹാമിനായി. ലാൻസിനിയുടെ ഇരട്ട ഗോളുകളാണ് വെസ്റ്റ് ഹാമിന് കരുത്തായത്. ആദ്യ പകുതിയിൽ തന്നെ വെസ്റ്റ് ഹാം 3 ഗോളുകൾക്ക് മുന്നിൽ എത്തിയിരുന്നു. 22ആം മിനുട്ടിൽ അന്റോണിയോയിലൂടെ ആയിരുന്നു വെസ്റ്റ് ഹാം ലീഡ് എടുത്തത്.
മൂന്ന് മിനുട്ടുകൾ കഴിഞ്ഞ് ലാൻസിനിയുടെ ഗംഭീര ഗോൾ മോയ്സിന്റെ ടീമിന്റെ ലീഡ് ഇരട്ടിയാക്കി. ആദ്യ പകുതിയുടെ അവസാനം ഹാൻഡ് ബോളിന് ലഭിച്ച പെനാൾട്ടിയും ലാൻസിനി വലയിൽ എത്തിച്ചു. ഈ 3 ഗോൾ ലീഡ് 83ആം മിനുട്ട് വരെ നീണ്ടു നിന്നു. പിന്നെ ആയിരുന്നു പാലസിന്റെ തിരിച്ചടി. 83ആം മിനുട്ടിൽ എഡ്വേർഡിന്റെ ഡൈവിങ് ഫിനിഷിൽ പാലസ് കളിയിലേക്ക് തിരികെയെത്തി. 90ആം മിനുട്ടിൽ ഒരു ഫ്രീകിക്കിൽ നിന്ന് ഒലിസെ കൂടെ ഗോൾ നേടിയതോടെ സ്കോർ 3-2 എന്നായി. അവസാന മിനുട്ടുകൾ ശ്രമിച്ചിട്ടും പാലസിന് സമനില ഗോൾ കണ്ടെത്താൻ ആയില്ല.
ഈ വിജയത്തോടെ വെസ്റ്റ് ഹാം 34 പോയിന്റുമായി അഞ്ചാം സ്ഥാനത്ത് എത്തി. പാലസ് 11ആം സ്ഥാനത്താണ് ഉള്ളത്.
