ഇന്ന് യൂറോപ്പ ലീഗ് പ്രീക്വാർട്ടറിന്റെ രണ്ടാം പാദത്തിൽ മാഞ്ചസ്റ്റർ യുണൈറ്റഡ് എ സി മിലാനെ നേരിടും. ആദ്യ പാദത്തിൽ ഓൾഡ്ട്രാഫോർഡിൽ വെച്ച് ഏറ്റുമുട്ടിയപ്പോൾ ഇരു ടീമുകളും ഒരോ ഗോൾ വീതം അടിച്ച് സമനിലയിൽ പിരിഞ്ഞിരുന്നു. ആദ്യ പാദത്തിൽ യുണൈറ്റഡിന്റെ ഹോം മത്സരം ആയിരുന്നു എങ്കിലും എ സി മിലാൻ ആയിരുന്നു മെച്ചപ്പെട്ട ഫുട്ബോൾ കാഴ്ചവെച്ചത്.
അന്ന് യുണൈറ്റഡ് ടീമിൽ പല താരങ്ങളും പരിക്ക് കാരണം ഉണ്ടായിരുന്നില്ല. എന്നാൽ ഇന്ന് പോഗ്ബ അടക്കം പല പ്രധാന താരങ്ങളും തിരിച്ചെത്തുന്നുണ്ട്. കവാനി പക്ഷെ ഇന്നും കളിക്കില്ല. മിലാൻ നിരയിൽ ഇന്ന് ഇബ്രഹിമോവിച് തിരികെയെത്തും. മാഞ്ചസ്റ്റർ യുണൈറ്റഡ് വിട്ട ശേഷം ആദ്യമായാണ് ഇബ്ര യുണൈറ്റഡിനെതിരെ കളിക്കുന്നത്. ഇബ്രയുടെ സാന്നിദ്ധ്യം എ സി മിലാന് പ്രതീക്ഷ നൽകും. ഇരു ടീമുകളുടെയും പ്രധാന കിരീട പ്രതീക്ഷയാണ് യൂറോപ്പ ലീഗ്. അതുകൊണ്ട് തന്നെ ഗംഭീര പോരാട്ടങ്ങൾക്ക് തന്നെ ഇന്ന് ഫുട്ബോൾ പ്രേമികൾക്ക് സാക്ഷിയാകാൻ കഴിയും. രാത്രി 1.30ന് നടക്കുന്ന മത്സരം തത്സമയം സോണി നെറ്റ്വർക്കിൽ കാണാം.
