ഓസ്‌ട്രേലിയൻ ഓപ്പണിൽ അവസാന പതിനാറിലേക്ക് മുന്നേറി രണ്ടാം സീഡ് റാഫേൽ നദാൽ. മികച്ച പ്രകടനം കാഴ്ചവച്ച മറ്റൊരു ഇടൻ കയ്യൻ ആയ ബ്രിട്ടീഷ് താരം കാമറൂൺ നോരിക്ക് പക്ഷെ ക്ലാസ് പ്രകടനം പുറത്തെടുത്ത നദാലിന് മുന്നിൽ നേരിട്ടുള്ള സെറ്റുകൾക്ക് കീഴടങ്ങേണ്ടി വന്നു. ഒരു ബ്രൈക്ക് കണ്ടത്തിയ നോരിക്ക് പക്ഷെ മോശം രണ്ടാം സർവീസുകൾ വിനയായപ്പോൾ 5 തവണയാണ് നദാൽ ബ്രിട്ടീഷ് താരത്തെ ബ്രൈക്ക് ചെയ്തത്. ആദ്യ സെറ്റിൽ നോരിയുടെ അവസാന സർവീസ് ബ്രൈക്ക് ചെയ്തു സെറ്റ് 7-5 നു നേടിയ നദാൽ രണ്ടാം സെറ്റ് 6-2 സ്വന്തമാക്കി മത്സരം ഒരു സെറ്റ് മാത്രം അകലെയാക്കി. മൂന്നാം സെറ്റിൽ ഒരു സെറ്റ് എങ്കിലും നേടാൻ ബ്രിട്ടീഷ് താരം പരിശ്രമിച്ചു എങ്കിലും നിർണായക ബ്രൈക്ക് കണ്ടത്തിയ നദാൽ സെറ്റ് 7-5 നു നേടി നാലാം റൗണ്ടിലേക്ക് മുന്നേറി. നാലാം റൗണ്ടിൽ ഇറ്റാലിയൻ താരവും 16 സീഡും ആയ ഫാബിയോ ഫോഗ്നിയാണ് നദാലിന്റെ എതിരാളി.
6-4, 6-3, 6-4 എന്ന സ്കോറിനാണ് ഫോഗ്നി 21 സീഡ് ആയ ഓസ്‌ട്രേലിയൻ താരം അലക്‌സ് ഡിമിനോറിനെ ഇറ്റാലിയൻ താരം മറികടന്നത്. അനായാസം ജയം കാണുമെന്നു കരുതിയ ഫോഗ്നിക്ക് എതിരെ അവസാന സെറ്റിൽ 5-1 ൽ നിന്നു 2 മാച്ച് പോയിന്റുകൾ രക്ഷിച്ചു ഡിമിനോർ തിരിച്ചു വരാൻ ശ്രമിച്ചു എങ്കിലും വൈകിപ്പോയിരുന്നു. മുമ്പ്‌ നദാലിനെ തോൽപ്പിച്ച ഫോഗ്നി നദാലിന് വെല്ലുവിളി ഉയർത്താവുന്ന താരം തന്നെയാണ്. എങ്കിലും പരസ്പരം കളിച്ച 16 ൽ 12 എണ്ണത്തിലും നദാൽ ആണ് ജയം കണ്ടത്. 19 സീഡ് ആയ റഷ്യൻ താരം കാരൻ കാചനോവിനെ നേരിട്ടുള്ള സെറ്റുകൾക്ക് മറികടന്ന ഒമ്പതാം സീഡ് മറ്റയോ ബരേറ്റിനിയും അവസാന പതിനാറിലേക്ക് മുന്നേറി. നേരിട്ടുള്ള സെറ്റുകൾക്ക് ജയം കണ്ടു എങ്കിലും കടുത്ത മത്സരം ആണ് ബരേറ്റിനി നേരിട്ടത്. മൂന്നു സെറ്റുകളും ടൈബ്രേക്കറിലേക്ക് നീണ്ടെങ്കിലും മൂന്നിലും ജയം ഇറ്റാലിയൻ താരത്തിന് ഒപ്പം ആയിരുന്നു. ഇരു താരങ്ങളും 2 വീതം ബ്രൈക്ക് വഴങ്ങിയ മത്സരത്തിൽ ബരേറ്റിനി 18 ഏസുകളും കാചനോവ് 12 ഏസുകളും ആണ് ഉതിർത്തത്.
