186 റണ്‍സെന്ന വലിയ ലക്ഷ്യം തേടിയിറങ്ങിയ രാജസ്ഥാന് കിംഗ്സ് ഇലവന്‍ പഞ്ചാബിനെതിരെ മികച്ച വിജയം. 17.2 ഓവറില്‍ 3 വിക്കറ്റ് നഷ്ടത്തിലാണ് ടീം ഏറെ നിര്‍ണ്ണായകമായ വിജയം നേടിയത്. ബെന്‍ സ്റ്റോക്സ് നല്‍കിയ മികച്ച തുടക്കത്തിന്റെ ബലത്തില്‍ രാജസ്ഥാന് ടോപ് ഓര്‍ഡര്‍ അവസരത്തിനൊത്തുയര്‍ന്നപ്പോള്‍ സഞ്ജുവും സ്മിത്തും റോബിന്‍ ഉത്തപ്പയും ബട്‍ലറുമെല്ലാം തിളങ്ങുന്ന കാഴ്ചയാണ് ഇന്ന് കാണാനായത്.
ടോപ് ഓര്‍ഡറില്‍ ബെന്‍ സ്റ്റോക്സിന്റെ മിന്നും ഇന്നിംഗ്സാണ് വലിയ സ്കോര്‍ ചേസ് ചെയ്യുവാനുള്ള തുടക്കം രാജസ്ഥാന് റോയല്‍സിന് നല്‍കിയത്. 5.3 ഓവറില്‍ 60 റണ്‍സ് കൂട്ടുകെട്ട് ഓപ്പണര്‍മാര്‍ നേടിയപ്പോള്‍ അതില്‍ 50 റണ്‍സും ബെന്‍ സ്റ്റോക്സ് ആണ് നേടിയത്. 26 പന്ത് നേരിട്ട താരത്തിന് എന്നാല്‍ അര്‍ദ്ധ ശതകത്തിന് ശേഷം റണ്‍സൊന്നും നേടാനായില്ല. 6 ഫോറും മൂന്ന് സിക്സുമാണ് ബെന്‍ സ്റ്റോക്സ് നേടിയത്. ക്രിസ് ജോര്‍ദ്ദാനാണ് സ്റ്റോക്സിന്റെ വിക്കറ്റ്.
സ്റ്റോക്സിന് പകരം ക്രീസിലെത്തിയ സഞ്ജു മികച്ച രീതിയില്‍ തുടങ്ങിയപ്പോള്‍ മറുവശത്ത് റോബിന്‍ ഉത്തപ്പയും തന്നാലാവുന്ന തരത്തില്‍ റണ്‍സ് നേടി. ഇരുവരും ചേര്‍ന്ന് 51 റണ്‍സ് നേടിയെങ്കിലും 23 പന്തില്‍ നിന്ന് 30 റണ്‍സ് നേടിയ ഉത്തപ്പയെ മുരുഗന്‍ അശ്വിന്‍ ആണ് പുറത്താക്കിയത്.
അവസാന ആറോവറില്‍ വെറും 42 റണ്‍സ് വേണ്ടിയിരുന്ന രാജസ്ഥാന് എന്നാല്‍ വലിയ തിരിച്ചടിയാണ് അടുത്ത ഓവറില്‍ നേരിടേണ്ടി വന്നത്. ടീമിന്റെ ചേസിംഗ് മുന്നോട്ട് നയിച്ച സഞ്ജു സാംസണ്‍ അനാവശ്യമായ ഒരു റണ്ണൗട്ടിലൂടെ പുറത്തായപ്പോള്‍ വീണ്ടും രാജസ്ഥാന് ക്യാമ്പില്‍ പരിഭ്രാന്തി പരന്നു.
25 പന്തില്‍ നിന്ന് 48 റണ്‍സ് നേടിയ സഞ്ജു നാല് ഫോറും മൂന്ന് സിക്സുമാണ് നേടിയത്. സ്മിത്തുമായി ചേര്‍ന്ന് 34 റണ്‍സാണ് സഞ്ജു മൂന്നാം വിക്കറ്റില്‍ നേടിയത്. 24 പന്തില്‍ നിന്ന് 30 റണ്‍സെന്ന നിലയില്‍ മുഹമ്മദ് ഷമി എറിഞ്ഞ ഓവറില്‍ മൂന്ന് ബൗണ്ടറി സ്മിത്തും അവസാന പന്തില്‍ ജോസ് ബട്‍ലറും ബൗണ്ടറി നേടിയപ്പോള്‍ ഓവറില്‍ നിന്ന് 19 റണ്‍സാണ് വന്നത്.
സ്മിത്ത് 20 പന്തില്‍ 31 റണ്‍സ് നേടിയപ്പോള്‍ ജോസ് ബട്ലര്‍ 11 പന്തില്‍ 22 റണ്‍സ് നേടി. രണ്ട് നിര്‍ണ്ണായക സിക്സുകള്‍ അടക്കമായിരുന്നു ബട്‍ലറുടെ ഇന്നിംഗ്സ്.
