ന്യൂസിലാൻഡ് പര്യടനത്തിൽ ഇന്ത്യൻ ടീമിൽ കളിക്കാൻ കഴിഞ്ഞത് തന്റെ ആത്മവിശ്വാസത്തെ ഉയർത്തിയെന്ന് കേരള താര സഞ്ജു സാംസൺ. ന്യൂസിലാൻഡ് പര്യടനത്തിലെ രണ്ട് ടി20യിൽ സഞ്ജു സാംസൺ ഇന്ത്യക്ക് വേണ്ടി കളിച്ചിരുന്നു. എന്നാൽ താരത്തിന് മികച്ച പ്രകടനം പുറത്തെടുക്കാൻ കഴിഞ്ഞിരുന്നില്ല.
ആദ്യ മത്സരത്തിൽ 2 റൺസും രണ്ടാം മത്സരത്തിൽ 8 റൺസും മാത്രമാണ് സഞ്ജു സാംസണ് എടുക്കാനായത്. എന്നാൽ താൻ ന്യൂസിലാൻഡ് പര്യടനത്തിലെ മികച്ച വശങ്ങളെ മാത്രമാണ് താൻ നോക്കി കാണുന്നതെന്നും വിരാട് കോഹ്‌ലിക്കും രോഹിത് ശർമ്മക്കും ഒപ്പം ഡ്രസിങ് റൂം പങ്കിടാൻ കഴിഞ്ഞത് തന്നെ വലിയ കാര്യമാണെന്നും സഞ്ജു സാംസൺ പറഞ്ഞു.
ഗ്രൗണ്ടിന് അകത്തും പുറത്തും വെച്ച് ഒരുപാട് കാര്യങ്ങൾ അവരിൽ നിന്ന് പഠിക്കാൻ ഉണ്ടെന്നും ലോകത്തിലെ ഏറ്റവും മികച്ച ക്രിക്കറ്റ് ടീമിന്റെ ഭാഗമാവുകയെന്നത് ചെറിയ കാര്യമല്ലെന്നും സഞ്ജു സാംസൺ പറഞ്ഞു. ന്യൂസിലാൻഡിനെതിരായ മത്സരത്തിൽ നിർണായകമായ സൂപ്പർ ഓവറിൽ വിരാട് കോഹ്‌ലിക്കൊപ്പം ബാറ്റ് ചെയ്യാൻ ഇറങ്ങിയത് തന്നെ തന്റെ കരിയറിലെ വലിയ നേട്ടമാണെന്നും സഞ്ജു സാംസൺ പറഞ്ഞു.
