ഇന്നത്തെ ലാലിഗയിൽ മത്സരം ഒബ്ലക് എന്ന ഗോൾകീപ്പറും ബാഴ്സലോണയും തമ്മിൽ ആയിരുന്നു. ലാലിഗയിലെ വമ്പന്മാരായ ബാഴ്സലോണയും അത്ലറ്റിക്കോ മാഡ്രിഡും ഏറ്റുമുട്ടിയപ്പോഴാണ് ഒബ്ലക് ഹീറോ ആയത്. ഒന്നിനൊന്ന് മെച്ചമെന്ന രീതിയിൽ എണ്ണമില്ലാത്തത്ര സേവുകൾ ഒബ്ലക് നടത്തിയ മത്സരത്തിൽ പക്ഷെ എതിരില്ലാത്ത രണ്ടു ഗോളുകളുടെ വിജയം സ്വന്തമാക്കാൻ ബാഴ്സലോണക്ക് ആയി.
തുടക്കം മുതൽ ഒബ്ലകിനെ കീഴ്പ്പെടുത്താൻ ശ്രമിച്ചു എങ്കിലും അവസാന ആറു മിനുട്ടുകളിൽ മാത്രമാണ് ഒബ്ലക് കീഴടങ്ങിയത്. കളിയുടെ ആദ്യ പകുതിയിൽ റഫറിയെ തെറി പറഞ്ഞതിന് അത്ലറ്റിക്കോ സ്ട്രൈക്കർ ഡിയേഗോ കോസ്റ്റ ചുവപ്പ് കണ്ടിരുന്നു. അതോടെ തന്നെ അത്ലറ്റിക്കോ മാഡ്രിഡ് കളി കൈവിട്ടിരുന്നു. പൂർണ്ണമായു ഡിഫൻഡ് ചെയ്ത അത്ലറ്റിക്കോ ബാഴ്സലോണ ആക്രമണങ്ങൾ ക്ഷണിച്ചു വരുത്തുകയായിരുന്നു.
കളിയുടെ 85ആം മിനുട്ടിലും 87ആം മിനുട്ടിലും ആയിരുന്നു ബാഴ്സലോണയുടെ ഗോളുകൾ. ആദ്യ ഗോൾ സുവാരസും രണ്ടാം ഗോൾ മെസ്സിയുമാണ് നേടിയത്. ഈ ജയത്തോടെ ബാഴ്സക്ക് ലീഗ് തലപ്പത്ത് 11 പോയന്റിന്റെ ലീഡായി.
