സെമിയിൽ റോജർ ഫെഡററെ അട്ടിമറിച്ച അതേ വീര്യം ഫൈനലിലും ആവർത്തിച്ചത്തോടെ ജർമ്മനിയുടെ ‘സ്വരേവ്’ ബ്രദേഴ്‌സിലെ ഇളയവൻ അലക്‌സാണ്ടർ സ്വരേവ് ആദ്യമായി എടിപി ഫൈനൽ കിരീടത്തിൽ മുത്തമിട്ടു. ആറാം കിരീടമെന്ന റോജർ ഫെഡററുടെ റെക്കോർഡിന് ഒപ്പമെത്താനുള്ള സുവർണ്ണാവസരം ആയിരുന്നു ഇന്നലെ ജോക്കോവിച്ചിന്. ഗ്രൂപ്പ് ഘട്ടത്തിൽ ഒരു മത്സരം പോലും തോൽക്കാതെ എത്തിയ ലോക ഒന്നാം നമ്പർ താരത്തെ നേരിട്ടുള്ള സെറ്റുകളിലാണ് സാഷ കീഴടക്കിയത്. സ്കോർ 6-4,6-3. ലോക റാങ്കിങ്ങിൽ ആദ്യ 8 സ്ഥാനങ്ങളിലുള്ള കളിക്കാർ മത്സരിക്കുന്ന ടൂർണമെന്റാണ് എടിപി ടൂർ ഫൈനൽസ്. രണ്ട് ഗ്രൂപ്പുകളായിട്ടാണ് മത്സരം. അതുകൊണ്ട് തന്നെ സാധാരണ ടെന്നീസ് ടൂർണമെന്റുകൾ പോലെ നോക്കൗട്ട് രീതിയില്ല. ഗ്രൂപ്പ് ഘട്ടത്തിൽ നോവാക് ജോക്കോവിച്ചിനോടേറ്റ മധുര പ്രതികാരം കൂടിയായി സാഷയുടെ ഈ വിജയം.

ഡബിൾസ് വിഭാഗത്തിൽ നേട്ടങ്ങൾ കൊയ്തുകൊണ്ടേ ഇരിയ്ക്കുന്ന ജാക്ക് സോക്ക്- മൈക്ക് ബ്രയാൻ ജോഡികൾ എടിപി ഫൈനൽസ് കിരീടവും സ്വന്തമാക്കി. ബ്രയാൻ സഹോദരങ്ങളിൽ ബോബ് ബ്രയാൻ പരിക്ക് മൂലം വിട്ടു നിന്നതോടെ സോക്കുമായി ഒന്നിച്ച മൈക്ക് ഇക്കൊല്ലം 2 ഗ്രാൻഡ്സ്ലാം കിരീടങ്ങളും നേടി. ഹെർബർട്ട്-പെയ്റേ സഖ്യത്തിനെതിരെ ടൈബ്രേക്കറിൽ മാച്ച് പോയിന്റ് അതിജീവിച്ചാണ് സോക്ക്-ബ്രയാൻ സഖ്യം കിരീടം നേടിയത്.

Loading...