3 വർഷത്തെ ഇടവേളയ്ക്ക് ശേഷം മുൻ ലോക വനിത സിംഗിൾസ് ഒന്നാം നമ്പർ താരമായ കരോളിൻ വോസ്നിയാകി ടെന്നീസ് കളത്തിലേക്ക് തിരിച്ചു വരുന്നു. വോഗ് മാഗസിന് നൽകിയ അഭിമുഖത്തിൽ ആണ് താരം തന്റെ തിരിച്ചു വരവ് ഔദ്യോഗികമായി പ്രഖ്യാപിച്ചത്. കുടുംബത്തിന് വേണ്ടിയാണ് 2020 ൽ വിരമിക്കൽ പ്രഖ്യാപിച്ചത് എന്നു പറഞ്ഞ താരം ഇന്ന് തന്റെ രണ്ടു കുട്ടികൾക്ക് ഒപ്പം സന്തുഷ്ടയാണ് എന്നു പറഞ്ഞു.
എന്നാൽ കളത്തിൽ തനിക്ക് ഇനിയും സ്വപ്നങ്ങൾ ബാക്കിയുണ്ടെന്നും അത് നിറവേറ്റാൻ ആണ് തന്റെ തിരിച്ചു വരവ് എന്നും താരം കൂട്ടിച്ചേർത്തു. സ്വപ്നം പിന്തുടരാൻ പ്രായമോ കർത്തവ്യങ്ങളോ തടസം അല്ല എന്ന് തന്റെ കുട്ടികൾക്ക് കാണിക്കാൻ കൂടിയാണ് തന്റെ തിരിച്ചു വരവ് എന്നു മുൻ ഗ്രാന്റ് സ്ലാം ജേതാവ് കൂടിയായ ഡാനിഷ് താരം കൂട്ടിച്ചേർത്തു. മോൻഡ്രിയാൽ ഓപ്പണിൽ 33 കാരിയായ താരം കളത്തിലേക്ക് തിരിച്ചു വരും. നിലവിൽ യു.എസ് ഓപ്പണിൽ വോസ്നിയാകിക്ക് വൈൽഡ് കാർഡ് പ്രവേശനം നൽകും എന്നു യു.എസ് ഓപ്പൺ അധികൃതരും പറഞ്ഞു.
