മൂന്ന് സെറ്റ് നീണ്ട പോരാട്ടത്തിനൊടുവിൽ ജൂലിയൻ കാഷിനെയും ഹെൻറി പാറ്റനെയും തോൽപ്പിച്ച് ഇന്ത്യയുടെ രോഹൻ ബൊപ്പണ്ണയും ഓസ്ട്രേലിയൻ പങ്കാളി മാത്യു എബ്ഡനും യുഎസ് ഓപ്പണിൽ പുരുഷ ഡബിൾസ് ക്വാർട്ടറിലെത്തി.
ആറാം സീഡായ ഇന്തോ-ഓസ്ട്രേലിയൻ ജോഡി ബ്രിട്ടീഷ് ജോഡികളായ ക്യാഷ് ആൻഡ് പാറ്റൻ സഖ്യത്തിൽ നിന്ന് വലിയ വെല്ലുവിളി തന്നെ നേരിട്ടു. 6-4, 6-7(5), 7-6(10-6) എന്ന സ്കോറിനായിരുന്നു വിജയം. രണ്ട് മണിക്കൂറിനും 22 മിനുട്ടും മത്സരം നീണ്ടു നിന്നു.
ടോപ്പ് സീഡുകളായ നെതർലൻഡ്സിന്റെ വെസ്ലി കൂൾഹോഫും യുണൈറ്റഡ് കിംഗ്ഡത്തിന്റെ നീൽ സ്കുപ്സ്കിയും പ്രാദേശിക ജോഡികളായ നഥാനിയൽ ലാമൺസും ജാക്സൺ വിത്രോയും തമ്മിലുള്ള മൂന്നാം റൗണ്ട് മത്സരത്തിലെ വിജയികളെ ആകും ബൊപ്പണ്ണ ഇനി നേരിടുക.
