ചെയർ അമ്പയർക്ക് സസ്‌പെൻഷൻ

യുഎസ് ഓപ്പൺ ടെന്നീസിന്റെ രണ്ടാം റൗണ്ട് മത്സരത്തിനിടെ ഓസ്‌ട്രേലിയയുടെ നിക് ക്യൂരിയോസിന് മോട്ടിവേഷൻ നൽകിയ ചെയർ അമ്പയറെ എടിപി സസ്‌പെന്റ് ചെയ്തു. ടെന്നീസിലെ ലീഡിങ് അമ്പയർമാരിൽ ഒരാളും സ്വീഡൻകാരനുമായ മുഹമ്മദ് ലെഹ്യാനിയെയാണ് രണ്ടാഴ്ചത്തേക്ക് എടിപി സസ്‌പെന്റ് ചെയ്തത്. ഹെർബർട്ടുമായുള്ള മത്സരത്തിനിടെ ആദ്യ സെറ്റും, രണ്ടാം സെറ്റിൽ ഒരു ബ്രേക്കും വഴങ്ങി നിൽക്കുകയായിരുന്ന ക്യൂരിയോസിനെ ചെയറിൽ നിന്നിറങ്ങി ‘എനിക്ക് നിന്നെ സഹായിക്കണമെന്നുണ്ട്, ഇപ്പൊ കളിക്കുന്നതിനെക്കാൾ നന്നായി നിനക്ക് കളിക്കാൻ സാധിക്കും’ എന്ന വിധത്തിലുള്ള സംസാരമാണ് ലെഹ്യാനിക്ക് വിനയായത്.

മത്സരത്തിൽ പൊരുത്തിക്കയറിയ ക്യൂരിയോസ് ജയിക്കുകയും ചെയ്തു. അമ്പയറുടെ പെരുമാറ്റത്തിനെതിരെ റോജർ ഫെഡററെ പോലുള്ള താരങ്ങൾ അന്നേ രംഗത്ത് വന്നിരുന്നു. എന്നാൽ അമ്പയറുടെ സംസാരം തന്നിൽ യാതൊരു വിധ മാറ്റങ്ങളും ഉണ്ടാക്കിയില്ല എന്നാണ് ക്യൂരിയോസിന്റെ പക്ഷം.