അമേരിക്കൻ താരം ബ്രാൻഡൻ നകാഷിമയെ പരാജയപ്പെടുത്തിക്കൊണ്ട് ഡാനിൽ മെദ്വദേവ് 2026 സീസണിലെ തന്റെ ആദ്യ കിരീടം സ്വന്തമാക്കി. 2026 ജനുവരി 11-ന് നടന്ന ബ്രിസ്ബേൻ ഇന്റർനാഷണൽ ഫൈനലിൽ നേരിട്ടുള്ള സെറ്റുകൾക്കായിരുന്നു (6-2, 7-6) റഷ്യൻ താരത്തിന്റെ വിജയം.
ആദ്യ സെറ്റിൽ രണ്ട് തവണ നകാഷിമയുടെ സർവ് ബ്രേക്ക് ചെയ്ത് ആധിപത്യം ഉറപ്പിച്ച മെദ്വദേവിനെതിരെ രണ്ടാം സെറ്റിൽ അമേരിക്കൻ താരം ശക്തമായ പോരാട്ടം കാഴ്ചവെച്ചെങ്കിലും ടൈബ്രേക്കറിൽ 7-1 എന്ന സ്കോറിന് മെദ്വദേവ് വിജയം പിടിച്ചെടുക്കുകയായിരുന്നു. പാറ്റ് റാഫ്റ്റർ അരീനയിൽ 96 മിനിറ്റ് നീണ്ടുനിന്ന പോരാട്ടത്തിനൊടുവിൽ മെദ്വദേവ് തന്റെ ഇരുപത്തിരണ്ടാമത് എടിപി കിരീടത്തിൽ മുത്തമിട്ടു. 2019-ൽ ഫൈനലിൽ എത്തിയതിന് ശേഷം ബ്രിസ്ബേനിൽ മെദ്വദേവ് നേടുന്ന ആദ്യ കിരീടമാണിത്.
ജനുവരി 18-ന് മെൽബണിൽ ആരംഭിക്കുന്ന ഓസ്ട്രേലിയൻ ഓപ്പണിന് മുന്നോടിയായി ഈ വിജയം താരത്തിന് വലിയ ആത്മവിശ്വാസം നൽകും.
