കടുത്ത പേശിവലിവിനോട് (cramps) പോരാടി എലിയറ്റ് സ്പിസിറിയെ പരാജയപ്പെടുത്തി യാനിക് സിന്നർ ഓസ്ട്രേലിയൻ ഓപ്പണിന്റെ പ്രീക്വാർട്ടറിൽ പ്രവേശിച്ചു. മൂന്നാം സെറ്റിൽ 1-3 എന്ന നിലയിൽ പിന്നിലായിരുന്നിട്ടും അസാമാന്യ പോരാട്ടവീര്യം പുറത്തെടുത്ത സിന്നർ 4-6, 6-3, 6-4, 6-4 എന്ന സ്കോറിനാണ് വിജയം പിടിച്ചെടുത്തത്. ഇതോടെ ഓസ്ട്രേലിയൻ ഓപ്പണിൽ തോൽവി അറിയാതെയുള്ള തന്റെ കുതിപ്പ് 17 മത്സരങ്ങളിലേക്ക് നീട്ടാൻ നിലവിലെ ചാമ്പ്യനായി. മെൽബണിൽ തുടർച്ചയായ അഞ്ചാം വർഷമാണ് താരം അവസാന പതിനാറിൽ ഇടംപിടിക്കുന്നത്.
ഈ വിജയത്തിനൊപ്പം ഇറ്റാലിയൻ ടെന്നീസിലും പുതിയ ചരിത്രം പിറന്നു. സിന്നറെ കൂടാതെ ലോറൻസോ മുസെറ്റി, ലൂസിയാനോ ഡാർഡേരി എന്നിവരും പ്രീക്വാർട്ടറിൽ എത്തിയതോടെ, ഓസ്ട്രേലിയൻ ഓപ്പൺ ചരിത്രത്തിൽ ആദ്യമായി മൂന്ന് ഇറ്റാലിയൻ താരങ്ങൾ ഒരേസമയം ഈ നേട്ടത്തിലെത്തി
ഏറ്റവും ഒടുവിൽ കളിച്ച 31 സെറ്റുകളിൽ 30 എണ്ണത്തിലും വിജയിച്ച സിന്നർ, നിലവിൽ ടെന്നീസ് ലോകത്ത് പരാജയപ്പെടുത്താൻ ഏറ്റവും പ്രയാസമുള്ള താരമായി മാറിയിരിക്കുകയാണ്.
