എട്ടാമത്തെ തവണയും ദുബായ് ഓപ്പണിൽ മുത്തമിട്ടതോടെ കിരീടനേട്ടത്തിൽ ഫെഡറർ സെഞ്ച്വറി തികച്ചു. കുറച്ച് മുൻപ് നടന്ന ഫൈനലിൽ ഗ്രീസിന്റെ യുവതാരവും, ഓസ്‌ട്രേലിയൻ ഓപ്പണിൽ ഫെഡററെ കീഴടക്കുകയും ചെയ്ത സിസിപ്പാസിനെ നേരിട്ടുള്ള സെറ്റുകൾക്ക് (സ്കോർ 6-4,6-4) മറികടന്നാണ് ഫെഡറർ നൂറാം കിരീടം നേടിയത്.
ഇതോടെ ജിമ്മി കോണേഴ്‌സിന് ശേഷം 100 കിരീടങ്ങൾ എന്ന മാന്ത്രിക സംഖ്യയിൽ എത്തുന്ന രണ്ടാമത്തെ കളിക്കാരൻ എന്നുള്ള റെക്കോർഡും ഫെഡറർ സ്വന്തമാക്കി. ടൂർണമെന്റിന്റെ അവസാനത്തിൽ കാഴ്ച വെച്ച മേൽക്കൈ ഫൈനലിലും ഫെഡറർ ആവർത്തിക്കുകയായിരുന്നു. ഈ വിജയം ഓസ്‌ട്രേലിയൻ ഓപ്പണിൽ നേരിട്ട തോൽവിക്കുള്ള മധുര പ്രതികാരം കൂടിയായി ഫെഡറർക്ക്.
