ബെൽജിയത്തിന്റെ 21 കാരൻ വിങർ ജെറമി ഡോകുവിനെ മാഞ്ചസ്റ്റർ സിറ്റി സ്വന്തമാക്കും. ഫ്രഞ്ച് ക്ലബ് റെന്നേഴ്സ് താരം ആയ ഡോകുവിനു ആയി 60 മില്യൺ യൂറോ ആണ് യൂറോപ്യൻ ചാമ്പ്യന്മാർ മുടക്കുക. തന്റെ വേഗം കൊണ്ടു പ്രസിദ്ധം ആയ താരം ലോകത്തിലെ ഏറ്റവും മികച്ച യുവ വിങർ ആയാണ് പരിഗണിക്കപ്പെടുന്നത്. 2020 ൽ ബെൽജിയം ക്ലബ് ആന്റർലെറ്റ് നിന്നു ക്ലബ് റെക്കോർഡ് തുകക്ക് ആണ് താരം ഫ്രഞ്ച് ക്ലബിൽ എത്തുന്നത്.
തുടർന്ന് റെന്നേഴ്സിൽ 2020 ൽ അരങ്ങേറ്റം കുറിച്ച താരത്തിന് ഇടക്ക് പരിക്കുകൾ വില്ലൻ ആയിരുന്നു. എന്നാൽ കഴിഞ്ഞ സീസണിൽ ടീമിന് ആയി മികവ് കാണിച്ച താരം ലീഗിൽ 29 കളികളിൽ നിന്നു ആറു ഗോളുകൾ ആണ് നേടിയത്. റെന്നേഴ്സിനു ചാമ്പ്യൻസ് ലീഗ് യോഗ്യത നൽകാൻ ഡോകു വലിയ പങ്ക് ആണ് വഹിച്ചത്. ഈ സീസണിലും ലീഗിലെ ആദ്യ മത്സരത്തിൽ മെറ്റ്സിന് എതിരെ താരം ഗോൾ നേടിയിരുന്നു. 2020 ൽ ബെൽജിയം ദേശീയ ടീമിന് ആയി കളിച്ച താരം അവർക്ക് ആയി 14 കളികളിൽ നിന്നു 2 ഗോളുകൾ നേടിയിട്ടുണ്ട്.
