Category: NBA

എൻ.ബി.എ ഫൈനൽസിലെ നാലാം മത്സരത്തിൽ ജയം കണ്ടു ഗോൾഡൻ സ്റ്റേറ്റ് വാരിയേർസ്. ബോസ്റ്റൺ സെൽറ്റിക്സിനെ 107-97 എന്ന സ്കോറിന് തോൽപ്പിച്ചതോടെ ഫൈനൽ സീരീസ് 2-2 എന്ന നിലയിൽ ആക്കാനും അവർക്ക് കഴിഞ്ഞു. തികച്ചും അവിശ്വസനീയം ആയ പ്രകടനം കാഴ്ച വച്ച സ്റ്റെഫ് കറിയുടെ മികവിൽ ആണ് വാരിയേർസ് ജയം പിടിച്ചെടുത്തത്. ബോസ്റ്റണിന് ആയി ആർത്ത് വിളിച്ച കാണികൾക്ക് മുന്നിൽ 43 പോയിന്റുകളും, 10 റീബോണ്ടുകളും, 4 അസിസ്റ്റുകളും നേടിയ കറി ഏതാണ്ട് ഒറ്റക്ക് വാരിയേർസിനെ തോളിൽ ഏറ്റി. എൻ.ബി.എ ഫൈനൽസിൽ 40 നു മുകളിൽ പോയിന്റുകളും 10 നു മുകളിൽ റീബോണ്ടുകളും നേടുന്ന രണ്ടാമത്തെ പ്രായം കൂടിയ താരം ആയും 34 വയസ്സും 88 ദിവസവും പ്രായമുള്ള കറി മാറി.

2020 തിൽ 35 വയസ്സും 284 ദിവസവും ഉള്ളപ്പോൾ സമാന പ്രകടനം പുറത്ത് എടുത്ത സാക്ഷാൽ ലെബ്രോൺ ജെയിംസ് മാത്രം ആണ് കറിക്ക് മുന്നിലുള്ള ഏക താരം. ഏതാണ്ട് മത്സരത്തിൽ 42 മിനിറ്റ് സമയവും സെൽറ്റിക്സ് ആധിപത്യം പുലർത്തിയ മത്സരത്തിൽ പരിശീലകൻ സ്റ്റീവ് കെറിന്റെയും കറി, തോമ്പ്സൺ എന്നിവരുടെയും മികവിൽ ആണ് വാരിയേർസ് തിരിച്ചു വന്നത്. ക്ലെ തോമ്പ്സൺ 18 പോയിന്റുകൾ ആണ് മത്സരത്തിൽ നേടിയത്. എൻ.ബി.എ ഫൈനലുകളിൽ 200 അസിസ്റ്റുകൾ തികച്ച ഡ്രൈമണ്ട് ഗ്രീനും വാരിയേർസിന് ആയി തിളങ്ങി. ഫൈനലുകളിൽ മൂന്നു മത്സരങ്ങൾ ബാക്കിയുള്ളപ്പോൾ ഒരു മത്സരം മാത്രം ഇനി ബോസ്റ്റണിൽ കളിച്ചാൽ മതി എന്നത് വാരിയേർസിന് മുൻതൂക്കം നൽകുന്നുണ്ട്. ഫൈനലുകളിലെ അഞ്ചാം മത്സരം തിങ്കളാഴ്ച സാൻ ഫ്രാൻസിസ്കോയിൽ ആണ് നടക്കുക.

മിൽവവുകി ബക്‌സിന്റെ50 വർഷത്തെ കാത്തിരിപ്പിന് അവസാനം. ഇന്ന് ഫീനിക്സ് സണ്ണിനെ പരാജയപ്പെടുത്തി കൊണ്ടാണ് ബക്ക്‌സ് കിരീടത്തിൽ ഉമ്മ വെച്ചത്. 105-98 എന്ന സ്കോറിനാണ് ഇന്ന് ബക്ക്‌സ് വിജയിച്ചത്. ഹിയാനിസ് ആന്റെറ്റുകുമ്പോയുടെ ഗംഭീര പ്രകടനമാണ് ബക്‌സിനെ കിരീടത്തിലേക്ക് നയിച്ചത്. ഹിയാനിസ് ഇന്ന് 50 പോയിന്റും കളിയുടെ അവസാനത്തിലെ നിർണായകമായ ബ്ലോക്ക്‌ ഉൾപ്പെടെ 5 ബ്ലോക്കുകളും താരം നടത്തി. ഒരു എൻ ബി എ ഫൈനലിൽ 50 പോയിന്റ് എടുക്കുന്ന ഏഴാമത്തെ താരം മാത്രമാണ് ഹിയാനിസ്.

ബക്സിന്റെ രണ്ടാം എൻ ബി എ കിരീടം മാത്രമാണിത്. ഇതിനു മുമ്പ് 1971ൽ ആയിരുന്നു ബക്ക്‌സ് എൻ ബി എ കിരീടം ഉയർത്തിയത്. ഹിയാനിസ് ആന്റെറ്റുകുമ്പോ ഇന്ന് ആദ്യ പകുതിയിൽ തന്നെ 33 പോയിന്റുകൾ നേടിയിരുന്നു. ഫൈനലിലെ എം വി പി ആയതും ഹിയാനിസ് തന്നെ. ഹിയാനിസിന്റെ സഹോദരങ്ങളായ തനാസിസും കോസ്റ്റാസും നേരത്തെ തന്നെ എൻ ബി എ കിരീടം നേടിയിരുന്നു.

നീണ്ട ഇടവേളയ്ക്കും കാത്തിരിപ്പിനും അവസാനം ലോസ് ആഞ്ചെലെസ് ലേകേഴ്സ് വീണ്ടും ബാസ്ക്കറ്റ്ബോൾ ലോകത്തിന്റെ തലപ്പത്ത് എത്തിയിരിക്കുന്നു. കോബെ ബ്രയാന്റ് എന്ന ഇതിഹാസം 2010ൽ കിരീടം നേടിക്കൊടുത്ത ശേഷം ലേകേഴ്സ് ആദ്യമായി എൻ ബി എ ഫൈനലിൽ എത്തിയത് ഇത്തവണ ആയിരുന്നു. അന്ന് കോബെ ആയിരുന്നു എങ്കിൽ ഇന്ന് ലെബ്രോൺ ജെയിംസ് ലൈകേഴ്സിന്റെ ഹീറോ ആയി. മിയാമി ഹീറ്റിനെ ആറാം ഗെയിമിൽ തകർത്ത് എറിഞ്ഞ് കൊണ്ടാണ് ലൈകേഴ്സ് ഇന്ന് കിരീടം ഉറപ്പിച്ചത്.

ഇന്ന് നടന്ന മത്സരം 106-93 എന്ന സ്കോറിനാണ് ലൈകേഴ്സ് വിജയിച്ചത്. ഇതോടെ ഏഴ് സീരീസ് ഫൈനൽ 4-2ന് ലൈകേഴ്സ് സ്വന്തമാക്കി. ലൈകേഴ്സിന്റെ 17ആം എൻ ബി എ കിരീടമാണിത്. ബോസ്റ്റൻ കെൽറ്റിക്സിനിപ്പം ഏറ്റവും കൂടുതൽ എൻ ബി എ കിരീടം ഉള്ള ടീമായി ഇതോടെ ലൈകേഴ്സ് മാറി. ഫൈനലിൽ ലെബ്രോൺ ജെയിംസ് തന്നെയാണ് എം വി പി ആയി മാറിയത്. 28 പോയിന്റ് ആൺ. ലെബ്രോൺ ജെയിംസ് ഇന്ന് നേടിയത്.

മൂന്ന് വ്യത്യസ്ത ടീമുകൾക്ക് ഒപ്പം എൻ ബി എ കിരീടം നേടുന്ന ആദ്യ താരമായി ഇതോടെ ലെബ്രോൺ ജെയിംസ് മാറി. 2012, 2013 സീസണുകളിൽ ഹീറ്റ്സിന് ഒപ്പവും 2016ൽ ക്ലെവലാൻഡിനൊപ്പവും ജെയിംസ് കിരീടം നേടിയിരുന്നു‌

പോലീസ് അധികൃതരാൽ വംശീയ വെറിക്ക് ഇരയായി കൊല്ലപ്പെട്ട ജോർജ് ഫ്ലോയിഡിന്റെ മരണം ഉയർത്തിയ ‘ബ്ളാക്ക് ലൈഫ്സ് മാറ്റർ’ പ്രതിഷേധ കൊടുങ്കാറ്റിന് ശേഷവും അമേരിക്കയിൽ വീണ്ടും പോലീസ് ക്രൂരത. മുമ്പ് കായിക രംഗത്ത് വലിയ പ്രതിഷേധം ജോർജ് ഫ്ലോയിഡിന്റെ മരണത്തിനു ശേഷം ഉണ്ടായെങ്കിൽ ഇത്തവണ തങ്ങളുടെ പ്രതിഷേധം കൂടുതൽ ശക്തമാക്കുക ആണ് കായിക രംഗം. ഈ കഴിഞ്ഞ വാരാന്ത്യത്തിൽ ആണ് അമേരിക്കൻ സംസ്ഥാനമായ വിസ്കോസിനിൽ പോലീസിന്റെ വെടിയേറ്റ് ജേക്കബ് ബ്ലേക്ക് എന്ന കറുത്ത വർഗ്ഗക്കാരൻ മരിക്കുന്നത്. 7 തവണയാണ് പോലീസ് ബ്ലേക്കിന്‌ നേരെ വെടി ഉതിർത്തത്. എന്നും കരുത്തവർഗ്ഗക്കാർക്ക് എതിരെയുള്ള അമേരിക്കൻ പോലീസ് ക്രൂരത അമേരിക്കയിൽ വലിയ വിവാദ വിഷയമാണ്. ഇതിനെ തുടർന്നാണ് ബ്ലേക്കിന്‌ പിന്തുണയുമായി എൻ.ബി.എ പ്ലേ ഓഫ് കളിക്കില്ലെന്ന ചരിത്രപരമായ തീരുമാനം വിസ്കോസിനിൽ നിന്നുള്ള ടീമായ മിൽവുകീ ബക്‌സ് എടുക്കുന്നത്.

തങ്ങളുടെ സ്റ്റേഡിയത്തിൽ നിന്നു അധികം അകലെയല്ലാതെ താമസിക്കുന്ന ബ്ലേക്കിന്റെ കൊലപാതകത്തെ തുടർന്ന് പ്ലേ ഓഫ് കളിക്കില്ല എന്ന ഉറച്ച തീരുമാനം ബക്‌സ് ടീം എടുക്കുക ആയിരുന്നു. എൻ.ബി.എ പ്ലേ ഓഫിൽ ഓർലാണ്ടോ മാജിക്കിന്‌ എതിരായ അഞ്ചാം മത്സരം ബക്സ് കളിക്കില്ല എന്നു തീരുമാനിച്ചതോടെ അവർക്ക് പിന്തുണ നൽകിയ മാജിക് ലോക്കർ റൂമിൽ നിന്ന് കളത്തിലേക്ക് വരാൻ വിസമ്മതിച്ചു. നിലവിൽ സീരീസിൽ ഒന്നിനെതിരെ മൂന്ന് മത്സരങ്ങൾ പിന്നിൽ നിൽക്കുക ആണെങ്കിലും ബക്സ് മത്സരം തോറ്റതായി അംഗീകരിക്കാൻ ഓർലാണ്ടോ മാജിക് തയ്യാറായില്ല. ഇതേ പോലീസിനാൽ 2018 ൽ തങ്ങളുടെ താരം സ്റ്റെർലിങ് ബ്രോൺ വംശീയ അധിക്ഷേപത്തിനു വിധേയമായ ചരിത്രമുള്ള ബക്സ് തങ്ങളുടെ ശക്തമായ നിലപാട് കൊണ്ട് വലിയ ശബ്ദമാണ് ഉയർത്തിയത്.

തുടർന്ന് ഹൂസ്റ്റൺ റോക്കറ്റ്‌സ്, ഒകലഹോമ സിറ്റി ടീമുകൾ തങ്ങളുടെ മത്സരം കളിക്കില്ലെന്ന തീരുമാനം എടുത്തു. സമാനമായ തീരുമാനം തന്നെ എടുത്ത ലോസ് ആഞ്ചൽസ് ലേക്കേഴ്‌സ്, പോർട്ട്ലാന്റ് ട്രൈൽ ബ്ലെസേഴ്‌സ് ടീമുകളും പോലീസ് അതിക്രമത്തിന് എതിരെ ശക്തമായി രംഗത്ത് വന്നു. ഇതോടെ ഈ മത്സരങ്ങൾ പിന്നീട്‌ നടത്തും എന്നു എൻ.ബി.എ അധികൃതർ പ്രഖ്യാപിച്ചു. എന്നാൽ പിന്നീട് പ്രഖ്യാപിച്ച ദിവസം കളിക്കാൻ ടീമുകൾ തയ്യാറാവുമോ എന്നു ഇപ്പോൾ വ്യക്തമല്ല. തങ്ങളുടെ ബേസ് ബോൾ മത്സരം കളിക്കില്ല എന്നു മിൽവുകീ ഭ്രൂവെയ്‌സും ഇതിനകം വ്യക്തമാക്കിയിട്ടുണ്ട്. എന്നും രാഷ്ട്രീയപരമായി വലിയ തീരുമാനങ്ങൾ എടുത്ത പാരമ്പര്യം ആണ് എൻ.ബി.എ താരങ്ങൾക്ക് ഉള്ളത്. ജോർജ് ഫ്ലോയിഡ് വിഷയത്തിൽ അടക്കം ലൈബ്രോൺ ജെയിംസ് അടക്കം വലിയ താരങ്ങൾ എല്ലാം വലിയ പ്രതിഷേധം ആണ് ഉയർത്തിയത്. എന്നാൽ ഈ പ്രതിഷേധങ്ങൾ ഫലം കാണുന്നില്ല എന്ന തിരിച്ചറിവ് ആണ് മത്സരങ്ങൾ കളിക്കാൻ തയ്യാറാവാത്ത വിധം കടുത്ത തീരുമാനങ്ങൾ എടുക്കാൻ താരങ്ങളെ പ്രേരിപ്പിക്കുന്നത്. പോലീസിന്റെ അടക്കം വംശീയ അതിക്രമങ്ങളിൽ പ്രതിഷേധിച്ച് മത്സരങ്ങൾ കളിക്കാതെ അനിശ്ചിതകാല സമരത്തിലേക്ക് പോവാനുള്ള തീരുമാനം കളിക്കാരുടെ സംഘടന വോട്ടെടുപ്പിലൂടെ എടുത്തേക്കും എന്ന സൂചനയും പുറത്ത് വരുന്നുണ്ട്. എന്തായാലും വംശീയതക്ക് എതിരെ സന്ധിയില്ലാ പോരാട്ടത്തിലേക്ക് തന്നെയാണ് അമേരിക്കൻ കായികതാരങ്ങൾ ഇറങ്ങുന്നത് എന്നതാണ് വസ്തുത.