ലോക ഏഴാം നമ്പർ സഖ്യമായ ഇന്തോനേഷ്യയുടെ മുഹമ്മദ് റിയാൻ, ഫജർ അൽഫിയാൻ സഖ്യത്തെ നേരിട്ടുള്ള സെറ്റുകൾക്ക് തകർത്തു ഇന്ത്യയുടെ ചിരാഗ് ഷെട്ടി, സ്വാതിക് സായിരാജ് റെഡി സഖ്യം ക്വാർട്ടർ ഫൈനലിലേക്ക് മുന്നേറി. പാരീസ് ഒളിമ്പിക്സ് ബാഡ്മിന്റൺ ഡബിൾസ് ഗ്രൂപ്പ് സിയിൽ കളിച്ച 3 മത്സരങ്ങളും ജയിച്ച സ്വാതിക്-ചിരാഗ് ഗ്രൂപ്പ് ജേതാക്കളും ആയി. ക്വാർട്ടർ ഫൈനലിൽ മറ്റു ഗ്രൂപ്പിലെ രണ്ടാം സ്ഥാനക്കാരെ ആണ് അവർ നേരിടുക.
ഒളിമ്പിക്സിൽ മിന്നും ഫോമിലുള്ള ഇന്ത്യൻ സഖ്യം മത്സരത്തിൽ പൂർണ ആധിപത്യം ആണ് പുലർത്തിയത്. ആദ്യ സെറ്റ് 21-13 നു നേടിയ സ്വാതിക്-ചിരാഗ് ആദ്യം തന്നെ നയം വ്യക്തമാക്കി. തുടർന്ന് രണ്ടാം സെറ്റിലും 21-13 എന്ന സ്കോറിന് തന്നെ ജയം കണ്ട അവർ മത്സരവും ഗ്രൂപ്പിലെ ഒന്നാം സ്ഥാനവും സ്വന്തം പേരിലാക്കി. ഒളിമ്പിക്സിൽ ഗ്രൂപ്പ് ജേതാക്കൾ ആവുന്നതും ക്വാർട്ടർ ഫൈനലിലും എത്തുന്ന ആദ്യ ഇന്ത്യൻ ഡബിൾസ് ടീം ആയും അവർ മാറി.
