പാരീസ് ഒളിമ്പിക്സ് പുരുഷ സിംഗിൾസ് ബാഡ്മിന്റൺ പ്രീ ക്വാർട്ടറിൽ ഇന്ത്യൻ താരങ്ങൾ തമ്മിലുള്ള പോരാട്ടത്തിൽ അനായാസ ജയവുമായി ലക്ഷ്യ സെൻ. 13 സീഡ് കൂടിയായ എച്ച്.എസ് പ്രണോയിക്ക് എതിരെ തികച്ചും അനായാസ ജയം ആണ് ലക്ഷ്യ നേടിയത്. മത്സരത്തിൽ തീർത്തും തളർന്ന നിലയിൽ കാണപ്പെട്ട പ്രണോയിക്ക് മത്സരത്തിൽ ഒരു ഘട്ടത്തിൽ പോലും എതിർ ഇന്ത്യൻ താരത്തിന് വെല്ലുവിളി ഉയർത്താൻ ആയില്ല.
മത്സരം തുടങ്ങിയത് മുതൽ വലിയ ആധിപത്യം ആണ് ലക്ഷ്യ പുലർത്തിയത്. ആദ്യ സെറ്റ് അവസാനം പ്രണോയ് തിരിച്ചു വരവ് ശ്രമം നടത്തിയെങ്കിലും സെറ്റ് ലക്ഷ്യ 21-12 എന്ന സ്കോറിന് നേടി. രണ്ടാം സെറ്റിൽ തീർത്തും അപ്രസക്തമായ നിലയിൽ ആണ് പ്രണോയ് കാണപ്പെട്ടത്. 21-6 എന്ന സ്കോറിന് സെറ്റ് ജയിച്ച താരം അനായാസം ഒളിമ്പിക്സ് അവസാന എട്ടിലേക്ക് മുന്നേറി. പരിശീലകരുടെ സഹായം ഇല്ലാതെയാണ് ഇന്ന് ഇരു താരങ്ങളും കളിക്കാൻ ഇറങ്ങിയത്.
